د هلمند ولایت په زندان کې د وسایطو ترمیمولو یو ورکشاپ ګټې اخیستنې ته وسپارل شو
د یاد زندان رئیس محترم مولوي بهاوالدین "عاطف" وايي، نوموړی ورکشاپ چې په اساسي ډول جوړ، په اړتیا وړ تخنیکي توکو سمبال او د مسلکي تخنیکي کسانو له خوا پرمخ وړل کېږي، په کې به د یاد ولایت د زندان اړوند ټول نقلیه وسایط ترمیمېږي.
د محترم مولوي عاطف په خبره، پخوا به دوی له یوې خوا د هلمند ولایت په زندان پورې اړوند دولتي نقلیه وسایط له زندانه بهر په لوړه بیه ترمیمول او له بلې خوا به یې د امنیت په اړه اندېښمن وو.
هغه زیاتوي، چې تر دې وروسته به هم دوی په خپل ورکشاپ کې اړوند وسایط په ارزانه ترمیموي او هم به له یادې اندېښې په امان کې وي.
په ورته وخت کې د هلمند ولایت د زندان مسوولین وايي، دوی د دغه زندان د وسایطو د ښې ساتنې په موخه یو سرپټی ځای په اساسي ډول جوړ او ګټې اخیستنې ته سپارلی دی.
جمادي الثاني- ۱۶/ ۱۴۴۵
د مقام د دفتر ریاست
د اطلاعاتو او عامه اړیکو امریت
