د زندانونو چارو د سمون ادارې نظامي مرستیال: « موږ خپلو اړوندو زندانونو کې د زندانیانو پر شکنجې نه، بلکې د هغوی پر بیا روزنې او اصلاح فکر کوو»

محترم لوی پاسوال قاري حبیب الله "بدر" نن (چارشنبې) د یادې ادارې د تعلیمي مرکز قومندانۍ د غونډو په تالار کې د جوړې شوې ناستې پرمهال، چې د ادارې د ښوونې او بیا روزنې رئیس محترم مولوي نظرمحمد "ناصري"، د کابل ولایت د څرخي پله مرکزي زندان رئیس محترم مولوي خالقداد "رحمت" او یو شمېر نورو ملکي او نظامي مسوولینو هم شتون درلود، د یاد مطلب په څرګندولو سره د زندانونو اړوندو مسوولینو او مؤظفینو ته په خطاب کې وویل: « د هېواد په زندانونو کې مو د زندانیانو د ښوونې او بیا رورنې برخې ته زیاته پاملرنه کړې او تاسو هم باید لکه د تل په شان دې ته چمتو واوسئ، چې نوموړي په اسلامي فکر او روحیې وروزئ او هغه زندانیان چې عمرونه یې ډېر دي تر نورو هغو ورسره ډېر ښه چلند وکړئ او ورته لازم سهولتونه برابر کړئ».
داراز، د نظامي چارو مرستیال محترم لوی پاسوال قاري حبیب الله "بدر" زیاته کړه، د زندانونو چارو د سمون اداره د زندانونو د چارو د لاپیاوړتیا او زندانیانو ته د غوره خدمتونو، دیني، عصري او حرفوي زده کړو د زمینو برابرولو په هدف بېلابېلې برنامې لري، څو د زندانیانو لپاره په زندان کې د ژوند ښه چاپېریال برابر شي.
همداشان، نوموړي د کابل ولایت د مرکزي محبس نظامي پرسونل ته سپارښتنه وکړه چې وخت بې ځایه تېر نه کړي، ورزش او مطالعې ته پاملرنه وکړي او خپله فکري او جسمي روغتیا پیاوړې کړي. 
په ورته وخت کې، د زندانونو چارو د سمون ادارې د ښوونې او بیا روزنې رئیس محترم مولوي نظرمحمد "ناصري" هم په خپلو خبرو کې وویل، 

دوی هڅه کوي چې زندانیانو ته په ښوونېزه او روزنیزه برخه کې مختلفې برنامې عملي کوي، څو پر مټ یې نوموړي په دیني، عصري او حرفوي زده کړو سمبال او د اصلاح شویو وګړو په توګه یې بیا ټولنې ته وړاندې کړي.
همدا شان، نوموړي د زندان پر مسوولینو غږ وکړ چې له زندانیانو سره ښه چلند او د هغوی شرعي او انساني حقوقونو ته پاملرنه وکړي.

محرم الحرام ۱۱/ ۱۴۴۶
د مقام د دفتر ریاست
د اطلاعاتو او عامه اړیکو امریت