د زندانونو چارو د سمون ادارې له لوري د (۳۴) ولایتونو د زندانونو له عدلي او قضایي اورګانونو سره د اړیکو ریاست کارکوونکو ته پنځه ورځینی ښوونيز سمینار پیل شو
دغه سیمینار چې د نوموړې ادارې د عدلي او قضایي اورګانونو سره د اړیکو ریاست له خوا او د ا.ا.ا د کورنیو چارو وزارت د کریمنال تخنیک ریاست په ګډه همکارۍ په مخ وړل کېږي د مرکزي او ولایتونو د زندانونو (۹۰) تنو مسوولینو ته به د بایمټریک او ډېټابیس پېژندنې په اړه هر اړخیزه معلومات ورکړل شي.
د زندانونو چارو د سمون ادارې د عدلي او قضایي اورګانونو سره د اړیکو رئیس محترم مولوي عبدالله "حقیق" په دې اړه په جوړو شویو مراسمو کې چې د ادارې یو شمېر مسوولینو او د کریمنال تخنیک ریاست د بایمټریک معاون محترم مولوي صالح محمد او ورسره مل پلاوي یې هم شتون درلود، ګډونوالو ته په خبرو کې وویل چې اداره یې تل کوښښ کوي څو د هېواد په زندانونو کې د کارکوونکو لپاره غوره او ارزښتمنې برنامې په لاره واچوي څو پر مټ یې په اداري چارو کې مثبت بدلونونه رامنځ ته شي.
داراز، د نوموړي په وینا په دغه سمینار کې به ګډونوالو ته د ا.ا.ا د کورنیو چارو وزارت د کریمنال تخنیک ریاست د پلاوي له لوري د دوه ورځو په موده کې به د بایمټریک په اړوند هر اړخیز معلومات او تجربې شریکې شي.
همداراز، د محترم مولوي حقیق په خبره: « د ادارې د تجربه لرونکي ټېم په مرسته یې د هېواد د زندانونو د عدلي او قضایي برخې د مسوولینو لپاره یو پرمختللی ډېټابیس جوړ کړی چې پرمټ یې د زندانیانو بند موده ثبت او اړوند چارې او معلومات په ښه ډول په کې پر مخ وړل کېږي او په اړه به یې د ادارې د تجربه لرونکو ښوونکو له لوري د یاد سمینار ګډونوالو ته د کارونې لازم معلومات ورکړل شي.
جمادي الثاني/ ۱۴۴۶
د مقام د دفتر ریاست
د اطلاعاتو او عامه اړیکو امریت
