د زندانونو چارو د سمون ادارې عمومي رئیس په مشرۍ پلاوي بلخ ولایت ته د سفر په ترڅ کې د دې ولایت د زندان نوې ودانۍ له رغنیزو چارو څخه د لیدنه ترڅنګ زندانیانو ته د یوه نوي اوعصري جومات د بنسټ ډبره کیښوده
د دې ادارې عمومي رئیس محترم الحاج مولوي محمد یوسف"مستري" په داسې حال کې، چې یو شمېر مرکزي او سیمه ییزو مسوولینو یې ملتیا کوله، بلخ ولایت ته د خپل سفر په ترڅ کې د نوموړي ولایت د زندان نوې ودانۍ له رغنېزو او روانو چارو د ارزونې سربېره له مسوولینو سره یې هم پر اړوندو مسایلو خبرې اترې وکړې.
داراز، د زندانونو چارو د سمون ادارې عمومي رئیس د بلخ ولایت د نوي زندان له رغنیزو چارو څخه په لیدنه کې د پروژې څرنګوالي، پرمختګ او تطبیق څرنګوالي ارزونه وکړله.
محترم الحاج مولوي محمد یوسف مستري د رغنیزو چارو د مسوولینو سره د لیدنې پر مهال ټینګار وکړ، چې د نوې ودانۍ کارونه باید د تخنیکي معیارونو پربنسټ پرمخ ولاړ شي او ټولې چارې دې په ټاکل شوي وخت کې بشپړې شي.
همداراز، د زندانونو چارو د سمون ادارې د عمومي رئیس محترم الحاج مولوي محمدیوسف مستري له لورې د نوموړي ولایت په نوي زندان کې د یو جومات جوړولو ډبره هم کېښودل شوه.
د یادونې ده، چې د بلخ ولایت نوی زندان رغنیزې چارې د زندانونو چارو د سمون ادارې په مالي لګښت په پاخه اساسي ډول جوړیږي چې په بشپړېدو سره به یې د نوموړي ولایت د زندان زندانیانو ته لازمې اسانتیاوې برابرې او د تعمیراتي چارو ستونزې به هوارې شي.
ربیع الاول ۲۷/ ۱۴۴۷
د مقام د دفتر ریاست
