ولایتي خبر: (خوست) د خوست والي په مشرۍ پلاوي د نوموړي ولایت له زندان څخه لیدنه وکړله
د خوست والي محترم الحاج مولوي عبدالله "مختار" په داسې حال کې چې د ياد ولایت د مرافعې محکمې عمومي رئیس محترم مولوي عین الله "خلیل" د علماوو شورا رئیس شيخ انور حسین" حسيني" او یو شمېر غړو یې ملتیا کوله د یاد ولایت له زندان څخه ليدنه وکړله.
د دې ولایت د والي په مشرۍ پلاوي د نوموړي زندان د زندانیانو د استوګنې خونې، روغتیايي خدمتونو، امنیتي وضعيت او نورو اړوندو چارو څخه له نږدې لیدنه وکړله.
د مرافعه محکمې عمومي رئیس محترم مولوي عین الله خلیل د زندانیانو قضیو د چټک او عادلانه تعقیب ډاډ څرګند کړ او وویل؛ چې د اسلامي شریعت په چوکاټ کې به د هر زنداني حق خوندي ساتل کېږي.
په پای کې، د خوست والي او ګډ پلاوي د زندان د مسوولینو له هڅو څخه مننه وکړله او د لا ښې همغږۍ او اصلاحاتو په برخه کې یې خپل نظرونه شریک کړل.
د یو بل خبر له مخې، د خوست ولایت په زندان کې د زندانیانو لپاره د الکوثر فکري او فرهنګي ادارې له لورې د فکري اصلاح په موخه سمینار پای ته ورسېده
د نوموړي زندان امر محترم مولوي ذبیح الله"طلحه"په وینا، دا ډول سمینارونه به د زندانیانو د فکري سمون سربېره د هغوی د اصلاح سبب وګرځي.
همدا شان، د سمینار ګډونوالو د خوښۍ په څرګندولو سره د دا ډول سمینارونو جوړول ګټور یاد کړل او د زندان مسوولینو څخه يې د ورته نورو برنامو پر جوړولو ټینګار وکړ.
شوال المکرم ۲۴/ ۱۴۴۷
د مقام د دفتر ریاست
د اطلاعاتو او عامه اړیکو امریت
