د زندانونو چارو د تنظیم ادارې له لورې د سره صلیب نړۍوالې کمېټې په همکارۍ د نوموړې ادارې د مرکز او ولایتو زندانونو یو شمېر مسوولینو ته د بیړنیو حالاتو د چمتووالي او احتمالي پلان جوړونې تر سرلیک لاندې درې ورځینی روزنیز ورکشاپ پیل شو
د دغه ورکشاپ د پرانیستې په مراسمو کې، د زندانونو چارو د تنظیم ادارې نظامي مرستیال محترم لوی پاسوال الحاج محمد کاظم "طارق"، مالي او اداري عمومي رئیس محترم مولوي عبدالهادي "مالي اخندزاده"، د نظامي چارو معاونیت د ارکان رئیس محترم پاسوال الحاج اسدالله "مولانا"د مقام د دفتر رئیس محترم قاري رحمت الله "ګلزاد"، له عدلي او قضایي اورګانونو سره د اړیکو رئیس محترم مولوي عبدالله "حقیق"، د اقتصادي برنامو او ستراتیژیکو اړیکو رئیس محترم عبیدالله "اخلاص"، د بېلابېلو ریاستونو یو شمېر مسوولینو او د سره صلیب نړیوالې کمېټې استازو ګډون کړی و.
په دې ورکشاپ کې، د زندانونو چارو د تنظیم ادارې د تعمیراتو، روغتیا او د کابل ولایت د توقیفخونو ریاستونو د کابل ولایت د ښځینه محبس امریت، بلخ، هرات، کندز، ننګرهار، کندهار او پروان ولایتونو مسوولینو او د اقتصادي برنامو او ستراتېژیکو اړیکو ریاست استازي ګډون لري.
د زندانونو چارو د تنظیم ادارې نظامي مرستیال محترم الحاج محمد کاظم طارق د ورکشاپ د پرانیستې پر مهال وویل، چې د زندانونو په شان حساسو او امنیتي ادارو کې د بیړنیو حالاتو د مدیریت مهارتونه، د خطرونو پېژندنه او د احتمالي پلانونو جوړول ځانګړی اهمیت لري او د دې ډول روزنیزو پروګرامونو له لارې د مسوولینو مسلکي وړتیاوې لا پیاوړې کېږي.
داراز، نظامي مرستیال د سره صلیب نړۍوالې کمېټې د دوامدارو همکاریو په مننې زیاته کړله، نوموړې اداره هڅه کوي، چې زندانیانو ته غوره خدمتونه وړاندې او شرعي او انساني اصولو سره سم د هغوی حقونو ته پر وخت رسېدنه کوي.
همداشان، د نظامي چارو مرستیال د ورکشاپ ګډونوالو ته سپارښتنه وکړله، چې ترلاسه کړو زده کړو څخه په ګټې اخیستنې سره خپلې عملي چارې لا غښتلې او تر خپل لاس لاندې پرسونل سره یې تجربي شريکي کړي.
همدارنګه، د سره صلیب نړۍوالې کمېټې استازو د همکارۍ د دوام ژمنه او زیاته یې کړله، چې دغه اداره د زندانونو د وضعیت د ښه والي، د بشري معیارونو د پلي کېدو او د مسوولینو د ظرفیت لوړونې په برخه کې خپلو مرستو ته دوام ورکوي.
د یادونې وړ ده، چې په دې درې ورځیني ورکشاپ کې ګډونوالو ته د بیړنیو حالاتو د مدیریت اصول، د بحران پر مهال د پلان جوړونې عملي لارې چارې، د همغږۍ میکانیزمونه، د عملي سناریوګانو پر بنسټ تمرینونه ور زده شي، ترڅو د اړتیا پر مهال په چټک او مؤثر ډول اقدام وکړي.
ذوالحجة الحرام ۲۲/ ۱۴۴۷
د مقام د دفتر ریاست
د اطلاعاتو او عامه اړیکو امریت
