د زندانونو چارو د تنظیم ادارې عمومي رئیس د هرات ولایت د زندان له بېلابېلو برخو څخه لیدنه وکړله

محترم الحاج مولوي محمدیوسف "مستري" تېره ورځ هرات ولایت ته د خپل سفر په ترڅ کې د دغه ولایت له زندانه د لیدنې پرمهال د یاد زندان اداري، امنیتي او خدماتي چارې له نږدې وارزولې.

داراز، د زندانونو چارو د تنظیم ادارې عمومي رئیس په دې لیدنه کې د هرات زندان مسوولینو ته سپارښتنه وکړله، څو ټولو په ځانګړې توګه هغو محکوم په حبس افغانانو ته ډېره پاملرنه وکړي، چې په دې وروستیو کې له ایران هېواده افغانستان ته را لېږدول شوي او دې زندان کې ځای پر ځای شوي دي.

په ورته وخت کې، د هرات ولایت د زندان رئیس محترم ملا شراف الدین "مخلص" له خپله اړخه ډاډ ورکړ، چې دوی رالېږدول شویو زندانیانو لپاره لومړی روغتیايي خدمتونو وړاندې کړل، بیا یې ورته د نظافت اړوند، روغتیايي او د ژوند اړین توکي ورکړي او هم یې د هغوی د امنیت د خوندي ساتلو په پار خپلې هڅې ډېرې کړې دي.

محترم الحاج مولوي محمدیوسف مستري د یادو معلوماتو تر اورېدو وروسته د یاد زندان د مسوولینو او کارکوونکو هڅې وستایلې او ویې ویل، ټولې چارې باید د شرعي اصولو د هېواد نافذه قوانینو، بشري حقونو او ټاکل شویو طرزالعملونو له مخې پر مخ یووړل شي او په دې زندان کې ټولو زندانیانو ته د دیني، عصري او کسب زده کړو ښه زمینه برابره شي او هم یې د رواني او فزیکي روغتیا لپاره د ورزشي فعالیتونو لمن پراخه شي.

ذوالحجة الحرام ۲۷/ ۱۴۴۷

د مقام د دفتر ریاست

 د اطلاعاتو او عامه اړیکو امریت