د لوګر ولایت په زندان کې لسګونه تنه ښځینه او نارینه زندانیان د قرآن کریم د حفظ او ناظرې له زدهکړو فارغ شول
په دې اړه جوړ شویو مراسمو کې، د زندانونو چارو د تنظیم ادارې د پالېسۍ او مسلکي چارو مرستیال محترم الحاج قاري محمد بلال "فاتح"، د یادې ادارې د مقام د دفتر رئیس قاري رحمت الله "ګلزاد"، د دعوت او ارشاد رئیس محترم مولوي صدیق الله "صدیقي"، د ښوونې او بیا روزنې رئیس محترم مولوي نظر محمد "ناصري"، د ولایتونو سره د اړیکو رئیس محترم مولوي عبد الحی" اخندزاده "، د لوګر ولایت د مقام د دفتر رئیس، د محاکمو رئیسانو، د امنیت امر، د علماوو شورا رئیس او غړي، د زندان امر محترم مولوي حمیدالله "حیدري" او یو شمېر نورو مسوولینو هم ګډون کړی و.
د زندان د مسوولینو د معلوماتو پر بنسټ له یادو زده کړو څخه (۲۳) تنه محبوسین د قرآن کریم حفظ، (۲۷) تنه د ناظرې او (۷) تنه ښځینه محبوسینې د قرآن کریم د ناظرې برخو کې فراغت حاصل کړ.
په دغو مراسمو کې، محترم الحاج قاري محمد بلال فاتح د قرآن کریم د زده کړې د حفظ او ناظرې پر اهمیت خبرې وکړې او فارغ شویو زندانیانو ته یې د مبارکۍ سربېره د زده کړې او د خپل ژوند د اصلاح په برخه کې یو لړ سپارښتنې وکړې.
نوموړي، هغوی وهڅول چې ترلاسه کړو زده کړو څخه په خپل ورځني ژوند کې ګټه پورته او د علم او عمل له لارې د مثبت بدلون لپاره هڅې وکړي.
د مراسمو په پای کې، فارغانو ته د فراغت سندونه او ستاینلیکونه د ورکړې ترڅنګ د فضیلت پګړی ور په سر کړې.
دا په داسې حال کې ده، چې د زندانونو چارو د تنظیم ادارې په اړوندو زندانونو کې د دیني او عصري زدهکړو د بهیر د پیاوړتیا لپاره هڅې روانې دي، څو زندانیان له زدهکړو برخمن او د اصلاح او سالمې روزنې زمینه ورته برابره شي.
بل لور ته بیا، د زندانونو چارو د تنظیم ادارې د پالېسۍ او مسلکي چارو مرستیال په مشرۍ پلاوي د لوګر ولایت د زندان بېلابېلې برخې وارزولې.
همداشان، د ادارې د پالېسۍ او مسلکي چارو مرستیال محترم الحاج قاري محمد بلال فاتح په مشرۍ پلاوي دغه زندان د بېلابیلو برخو څخه د لیدنې ترڅنګ يې د زندانیانو سره په کتنه کې د هغوی د حال په اړه پوښتنه وکړله.
په ورته وخت کې، د پالېسۍ او مسلکي چارو مرستیال په مشرۍ پلاوي د نوموړي ولایت د زندان اداري، مالي، صنعتي، روغتیا او پخلنځي څخه هم لیدنه وکړله او اړوندو مسوولینو ته یې لازمې لارښوونې وکړې.
ربیع الثاني ۲۹/ ۱۴۴۸
د مقام د دفتر ریاست
د اطلاعاتو او عامه اړیکو امریت
