د کندهار د مرکزي زندان رئیس د دغه ولایت د سپين بولدک او تخته پُل ولسوالیو له توقیفخونو لیدنه وکړه
د محترم ملا نعمت الله "سراجي" په مشرۍ او د یو شمېر مسوولینو په ملتیا یوه پلاوي تېره ورځ، د کندهار ولایت د سپين بولدک او تخته پُل ولسوالیو ته د جلا، جلا سفرونه په ترڅ کې د یادو ولسوالیو له توقیفخونو څخه لیدنه وکړه.
په دې لیدنه کې لومړی د نوموړو توقیفخونو مسوولینو پلاوي ته د ترسره شویو فعالیتونو، لاسته راوړنو او اړوندو چارو کې د ځینو ستونزو په هکله معلومات وړاندې کړل، چې پلاوي د یادو فعالیتونو او لاسته راوړنو ستاینه وکړه او د ستونزو د حل لپاره یې ورسره ژمنه وکړه.
دغه راز، پلاوي د نوموړو ولسوالیو د توقیفخونو له توقیفیانو سره له نږدې ولیدل، هغوی ورته د دې توقیفخونو د مسوولینو له خوا د ښه چلند او برابرو شویو اسانتیاوو له امله مننه وکړه، خو له پلاوي یې هیله څرګنده کړه، څو د دوی ځینو مهمو او روا غوښتنو ته رسېدنه وکړي، چې پلاوي يې تر خپله وسه د رسېدنې ډاډ ورکړ.
په ورته وخت کې، د کندهار ولایت د مرکزي زندان رئیس محترم ملا نعمت الله "سراجي" او مل پلاوي یې د دې ولایت د سپين بولدک او تخته پُل ولسوالیو له امنیه قومندانانو سره هم په جلا، جلا توګه وکتل او د یادو ولسوالیو د توقیخونو او توقیفیانو او کاري پرسونل د امنیت د لا ښه والي لپاره د همکارۍ پر زیاتوالي او د امنیتي پېښو څخه د مخنیوي په هکله هراړخیز بحث او خبرې وکړې، چې د نوموړو امنیتي مسوولینو له خوا پلاوي سره د بشپړې همکارۍ ژمنه وشوه.
یاد پلاوی ژمن دی، چې دوی به په دوامداره توګه د کندهار ولایت د زندان او بندیانو او توقیفخونو او توقیفیانو وضعیت څاري او ستونزو ته به یې پروخت رسېدنه کوي.
ربېع الاول- ۶/ ۱۴۴۴
د اطلاعاتو او عامه اړیکو ریاست
