د ننګرهار له مرکزي زندانه د ښځو او ماشومانو په ګډون ۶۶ تنه ازاد شول
د امیرالمٶمنین (حفظه الله) د فرمان پربنسټ د ننګرهار د استيناف محکمې، د استخباراتو ریاست او امنیه قوماندانۍ د مسوولينو په ګډون جوړ شوي کمېسیون د دغه ولایت د مرکزي زندان د بندیانو دوسیې په کره توګه وڅېړلې، چې په ترڅ کې یې له نوموړي زندان څخه د ښځو او ماشومانو په ګډون په اصولي او قانوني توګه د ۶۶ تنو د خوشې پرېکړه صادره کړه.
له دې فرمان څخه هغه بندیان، چې جرمونه یې کم وي او یا ورته مقابل لوري(مدعي عليه) بخښنه کړې وي برخمنېدای شي.
د ننګرهار ولایت له مرکزي زندانه د خوشې شویو کسانو په استازولۍ شېرعلي او محمد ابراهیم خبرې وکړې او د یاد زندان له مسوولینو څخه یې له دوی سره د ښه سلوک او ورته د ښو امکاناتو برابرولو له امله مننه وکړه او ویې ویل، چې له دې روسته به خپل ژوند له اسلامي اصولو سره سم پرمخ وړي.
د یادولو وړ بولو، چې د دغې فرمان له مخې به تر راتلونکو ۴۵ ورځو پورې د ننګرهار ولایت د مرکزي د ټولو بندیانو جرمي دوسیې په دقیقه توګه وڅېړل شي.
د یو بل خبر له مخې، د ا.ا.ا د عامې روغتیا د محترم وزارت یوه پلاوي ننګرهار ته د خپل سفر پرمهال د دغه ولایت له مرکزي زندانه لیدنه وکړه او د یاد زندان روغتیايي کلینیک یې وارزاوه، په روغتیايي برخه کې یې عمده ستونزې یاداشت او د زندان له مسوولینو سره یې په خبرو کې د هغو د حل ډاډ ورکړ.
داراز، نوموړي پلاوي د ننګرها په مرکزي زندان کې بندیانو ته د روغتیايي اسانتیاوو د برابرولو په موخه د مسوولینوهلې ځلې وستایلې.
جمادي الثاني ۲۸/ ۱۴۴۴
د اطلاعاتو او عامه اړیکو ریاست
