د مرکز او ۱۹ ولایتونو د زندانونو د عفوې او تخفیف فرمانونو د پلې کولو مدیرانو او مسوولینو روزنیز ورکشاپ پایته ورسېد
د زندانونو چارو د سمون ادارې د مرکزي برخې او (۱۹) ولایتونو د زندانونو د عفوې او تخفیف فرمانونو د پلې کولو مدیرانو او مسوولینو لپاره د (عفوې او تخفیف د فرمانونو د پلې کولو او د حبس او حجز بدیلونو بهیر) تر عنوان لاندې دا جوړ شوی روزنیز ورکشاپ چې تېره ورځ پیل او نن(سې شنبې) پایته ورسېد، موخه یې د عفوې او تخفیف د فرمانونو پلي کول او د حبس او حجز د بدیلونو لټول او عملي کولو اړوند معلومات او روزنه ورکول وو.
په دې اړه د جوړو شویو مراسمو په ترڅ کې، چې د زندانونو چارو د سمون ادارې د مالي او اداري عمومي رئیس محترم مولوي عبدالهادي مالي"اخندزاده"، د ادارې د مقام د دفتر رئیس محترم عبیدالله "اخلاص"، د ښوونې او روزنې رئیس محترم مولوي عبدالوارث " سادات"، د دعوت او ارشاد رئیس محترم مولوي صدیق الله "صدیقي" او یو شمېر نورو مسوولینو هم شتون درلود، ویناوالو یې د ورکشاپ ګډونوالو ته په خپلو خبرو کې دا روزنې ډېرې مهمې وګڼلې او ترې یې وغوښتل، چې په ورکشاپ کې زده کړې روزنې په خپلو ولایتونو کې له نورو همکارانو سره شریکې کړي.
د دغې ورکشاپ د پای لپاره مراسمو کې ګډونوالو ته د فراغت د سند په توګه تصدیق پاڼې هم ورکړل شوې.
شعبان المعظم ۲۱/ ۱۴۴۳
د مقام د دفتر ریاست
د اطلاعاتو او عامه اړیکو امریت
