د بامیان ولایت د زندان رئیس او مل پلاوي یې د دې ولایت د یو شمېر ولسوالیو د توقیفخونو د بیا فعالیت په موخه سفر وکړ
د زندانونو چارو د سمون ادارې د عمومي رئیس محترم الحاج مولوي محمد یوسف "مستري" په سپارښتنه د بامیان ولایت د زندان رئیس محترم مولوي محمد ابراهیم "حقاني" او مل پلاوي یې د ورس، پنجاب او د یکاولنګ د ۱ نمبر او ۲ نمبر ولسوالیو د توقیفخونو د بیا فعالیت په موخه یادو ولسوالیو ته سفر وکړ او هلته یې د دې ولسوالیو له ولسوالانو، امنیه قوماندانانو، د محکمې له رئیسانو او د استخباراتو له مدیرانو سره ولیدل او په دې اړه یې ورسره سلا مشورې وکړې.
د بامیان ولایت د زندان رئیس وویل: 《د یادو توقیفخونو په فعالولو سره به د دې ولسوالیو توقیفیانو ستونزې هوارې، چارو ته به یې په وخت رسېدنه او لازمې اسانتیاوې ورته برابر شي.》
د یادولو وړ ده چې له دې وړاندې به د نوموړو ولسوالیو توقیفیان د بامیان ولایت مرکزي توقیفخونې ته رالېږدول او ساتل کېدل.
شوال المکرم ۲۷/ ۱۴۴۴
د مقام د دفتر ریاست
اطلاعاتو او عامه اړیکو امریت
