د زندانونو چارو د سمون ادارې د مرکزي برخو نظامي پرسونل د منځنيو زده کړو د ښوونځي کچه شپې لېسې ته پورته شوه
د دغې ادارې د رهبرۍ او مسوولینو په هڅو د دې ادارې اړندو هغو نظاميانو ته، چې د ځینو ستونزو له امله یې عصري زده کړې نیمګړې پاتې وې څه موده وړاندې د منځنيو زده کړو شپې ښوونځی جوړ شو، خو د یادو نظامیانو د لېوالتیا، د زده کړو کچې او غوښتنې ته په کتو د نوموړي ښوونځي کچه رسماً شپې لېسې ته پورته شوه.
د زندانونو چارو د سمون ادارې د ښوونې او بیا روزنې رئیس محترم مولوي عبدالوارث "سادات" په دې اړه د جوړو شویو مراسم پرمهال وویل، دوی د افغانستان د پوهنې محترم وزارت په همکارۍ یاد نظامي پرسونل لپاره د زده کړو د اسانتیاوو برابرولو په تکل دا لېسه د کابل څرخي پله د زندان د ګارنېزیون په انګړ کې رامنځته کړه او په خبره یې نوموړي نظامیان له دې وروسته کولی شي په کې تر دولسم ټولګي پورې خپلې زده کړې بشپړې کړي.
داراز، محترم مولوي سادات د یادې لېسې له زده کوونکو وغوښتل، چې دا دې د ځان لپاره یو غوره فرصت وګڼي او پر خپل وخت دې په ټولګیو کې حاضر وي.
همداشان، د زندانونو چارو د سمون ادارې د ښوونې او بیا روزنې رئیس د دغې لېسې د ښوونکو د مخکنیو هڅو د ستاینې ترڅنګ وویل، هیله لري چې د زده کړو کیفیت لانور هم ښه شي.
جمادي الثاني-۱۷ / ۱۴۴۵
د مقام د دفتر ریاست
د اطلاعاتو او عامه اړیکو امریت
