ولایتي خبرونه(سرپل- سمنګان- غزني- میدان وردګ) د سرپل او سمنګان ولایتونو د عدلي او قضايي اورګانونو پلاوو د یادو ولایتونو د زندانونو له مسوولینو سره ولیدل
تیر ورځ د دې ولایتونو د عدلي او قضايي اورګانو پلاوو د یادو زندانونو مسوولینو سره ولیدل او د ا.ا.ا عالیقدر مشرتابه (حفظه الله) لخوا د زندانیانو د سزا د عفوې او تخفیف اړوند د کوچني اختر په مناسبت د فرمان پلي کولو په هکله یې ورسره خبرې وکړې.
داراز، نوموړو پلاوو د یادو ولایتونو د زندانیانو د جرمي دوسیو او د بند مودې د ارزونې وروسته هغوی ته ډاډ ورکړ چې د کوچني اختر د رارسېدو په پار د ا.ا.ا عالیقدر مشرتابه (حفظه الله) د فرمان صادریدو سره به سم په شرایطو وړ زندانیانو له ډلې به ځینو ته د قید په موده کې تخفیف او ځېني نور به خوشي شي.
د یو بل خبر له مخې، د غزني ولایت د زندان پر زندانیانو خرما، بسکیټ او قیماق وویشل شول
د دې ولایت د زندان مسوولینو له لورې یو اندازه خرما، بسکیټ او قیماق د نوموړي زندان پر زندانیانو په روڼه توګه وویشل شول.
داراز، یادو مسوولینو په خیریه بنسټونو هم غږ وکړ چې د روژې په دې مبارکه میاشت کې له دوی سره خپلو مرستو ته دوام ورکړي.
بل خوا بیا، د میدان وردګ ولایت په زندان کې ۳۰ تنه زندانیان د لیک او لوست زده کړو کورس څخه فارغ شول
تیره ورځ د میدان وردګ ولایت په زندان کې د یو لړ مراسمو په ترڅ کې ۳۰ تنو زندانیانو او محجوزینو د لیک او لوست زده کړو کورس په بشپړولو سره د فراغت سندونه ترلاسه کړل.
داراز، د دې ولایت د زندان مسوولینو د زندانیانو لپاره زده کړې اړینې یادې کړې او ډاډ یې ورکړ چې په راتلوونکې کې به ورته نورو پرګرامونو ته هم دوام ورکړي څو نا لوستي زندانیان هم د زده کړو له نعمت څخه برخمن شي.
رمضان المبارک ۱۶/ ۱۴۴۵
د مقام د دفتر ریاست
د اطلاعاتو او عامه اړیکو امریت
