د زندانونو چارو د سمون ادارې د نظامي مرستیال په مشرۍ پلاوي د ننګرهار ولایت له زندان څخه لیدنه وکړله
د زندانونو چارو د سمون ادارې نظامي مرستیالمحترم لوی پاسوال قاري حبیب الله "بدر" په داسې حال کې چې د داخلي تفتیش رئیس محترم فضل احمد " احمدي"، د اقتصادي برنامو او ستراتیژیکو اړیکو رئیس محترم عبید الله " اخلاص"،د مالي اوحسابي رئیس محترم حکمت "مشعل" او یو شمېر نورو مسوولینو یې ملتیا کوله، ننګرهار ولایت ته د سفر پر مهال د یاد ولایت د زندان مسوولینو سره د کتنې په ترڅ کې پر اړوندو مسایلو بحث وکړ.
په ورته مهال، د نظامي چارو مرستیال په مشرۍ پلاوي د ننګرهار د زندان پرسونل او له زندانیانو سره ولیدل او هغوی د یاد زندان د مسوولینو له خوا د دوی د امنیت د خوندیتوب په موخه له هڅو د مننې ترڅنګ، د خپلو جرمي دوسیو پروخت څېړلو او د برخلیک روښانه کولو په اړه خپلې غوښتنې شریکې کړې، چې د پلاوي مشر ورته د رسېدنې ډاډ ورکړ.
داراز، پلاوي د نوموړي زندان د پرسونل او زندانیانو د خوړو (اعاشې)، اباتې، پخلنځي، تعمیراتي او روغتیايي چارو وضعیت له نږدې وارزاوه او د ستونزو حلولو، لازمو اسانتیاوو برابرولو او روا غوښتنو ته د رسېدنې په موخه اړوندو مسوولینو ته لازمې لارښوونې وکړې.
همداشان، محترم لوی پاسوال قاري حبیب الله "بدر" او مل پلاوي یې د دغه زندان د امنیتي ټاورونو، قراولونو، امنیتي پوستو او نورو برخو څخه لیدنه وکړله او د امنیتي تدابیرو لا ښه والي لپاره یې اړوندو مسوولینو ته لازمې سپارښتنې وکړې.
د یادونې وړ بولو چې د زندانونو چارو د سمون ادارې رهبري تل هڅه کوي، څو د مرکز او ولایتونو له زندانونو او بندیانو څخه لیدنه وکړي، د امنیتي او نورو برخو وضعیت یې وارزوي او ستونزو ته یې رسېدنه وکړي.
ذوالقعده الحرام ۲۱/ ۱۴۴۶
د مقام د دفتر ریاست
د اطلاعاتو او عامه اړیکو امریت
