د زندانونو چارو د سمون ادارې د رهبرۍ شورا غونډه کې د ځینو اړینو مسایلو په اړه خبرې اترې او مشورې وشوې
دغه غونډه، چې نن(سې شنبه) د دې ادارې د عمومي رئیس محترم الحاج مولوي محمدیوسف "مستري" په مشرۍ او د پالېسۍ او مسلکي چارو مرستیال محترم الحاج محمد کاظم "طارق"، د مالي او اداري عمومي رئیس محترم مولوي عبدالهادي "مالي اخندزاده"او د ادارې د مرکزي برخو یو شمېر رئیسانو، همدا شان ملکي او نظامي مسوولینو په ګډون جوړه شوې وه، په کنړ، ننګرهار او لغمان ولایتونو کې د زلزلې پېښه یو زړه بوږنوونکې او له درده ډکه وبلله، چې په خواشینۍ سره ګڼ شمېر هیوادوال مو په کې شهیدان او ټپیان شوي، د الله تعالی له درباره شهیدانو ته جنت الفردوس او ټپیانو ته د عاجلې او پوره شفا غوښتنه وکړله.
دغه راز، په غونډه کې پرېکړه وشوه، چې د مشرقي زون زلزله ځپلو سره به نوموړې اداره هم د امکان تر بریده مرسته وکړي.
همدا شان، محترم الحاج مولوي محمد یوسف مستري د غونډې ګډونوالو ته سپارښتنه وکړله، چې له یو بل سره د اتحاد او اتفاق لرلو ترڅنګ د چارو د لا ښه ترسراوي او زندانیانو ته د اسانتیا په موخه له یو بل سره مشوره وکړئ او کوم نعمتونه چې د الله تعالی (جل جلاله) له خوا راکړل شوي دي شکر ګزاره اووسو.
د غونډې پر دوام د محبسونو د چارو لا ښه والي په موخه پر یو شمېر حقوقي او تخنیکي مسایلو او زندانیانو ته د لاښو خدمتونو وړاندې کولو په هکله خبرې اترې او په اړه یې اصولي او تقنیني اسنادو په رڼا کې لازمې پرېکړې وشوې.
داراز، په یاده غونډه کې يو شمېر رئیسانو د چارو لا ښه والي لپاره خپل نظرونه، مشورې او وړاندیزونه د زندانونو چارو د سمون ادارې له رهبرۍ سره شریک کړل، چې د رهبرۍ محترم مقام يې په اړه لازمې لارښوونې وکړې.
ربیع الاول ۹/ ۱۴۴۷
د مقام د دفتر ریاست
د اطلاعاتو او عامه اړیکو امریت
