ولایتي خبرونه:(کندز، بادغیس) د کندز د زندان رئیس او مل پلاوي یې د دې ولایت د امام صاحب ولسوالۍ له توقیفخونې څخه ليدنه وکړله
د دغه ولایت د زندان رئیس محترم ملا نعمت الله "سراجي" او مل پلاوي یې تېره ورځ د نوموړي ولایت د امام صاحب ولسوالۍ له توقیفخونې څخه د لیدنې پرمهال د یادې توقیفخونې له مسوولینو سره په اړوندو مسایلو خبرې اترې وکړې.
داراز، پلاوي د دغې ولسوالۍ د توقیفخونې توقیفیانو د اوسېدو ځایونه، اعاشې، اوبو او افتابۍ سربېره له نوموړو سره ولیدل او هغوی هم له نوموړي پلاوي څخه د دوی د وضعیت او حال د ارزونې له کبله د مننې تر څنګ خپلې ستونزې او غوښتنې شرېکې کړې چې د پلاوي له لورې د هغوی دې غوښتنو ته د رسېدنې، د هغوی د حقونو رعایتولو او ورته د لازمو اسانتیاوو د برارولو ژمنه وشوه.
بل خوا بیا، د باغیس ولایت د زندان د اصلاح مرکز له محجوزینو او ښځینه محبوسینو سره د (یونیسف) موسسې له لورې د حفظ الصحې توکو مرسته وشوه
یاده مرسته، د اقتصادي برنامو او ستراتیژیکو اړیکو ریاست په همغږۍ، چې په کې ستلونه، کوزې او یو شمېر د اړتیا وړ نور توکي شامل ول، د یاد زندان مسوولینو له لورې د نوموړې موسسې د استازو په حضور کې د یاد زندان پر محجوزینو او ښځینه محبوسینو باندې وویشل شوې.
داراز، د یاد زندان مسوولینو د نوموړې موسسې له مرستو څخه مننې ترڅنګ راتلونکي کې هم د ورته مرستو غوښتنه وکړله.
ربېع الاخر ۴/ ۱۴۴۷
د مقام د دفتر ریاست
د اطلاعاتو او عامه اړیکو امریت
