ولایتي خبرونه(هلمند، پکتیا) د هلمند ولایت د زندان اداري پرسونل ته د عامه پوهاوي په پار درې ورځینی ښوونیز سمینار پیل شو
دغه سمینار د زندانونو چار د سمون ادارې د رهبرۍ په لارښونه او د یادې ادارې د خدماتو ریاست له لورې د نوموړي ولایت د زندان د خدماتو، لوژستیک، صنعتي، تعلیم او تربیه، تخنیک او تکنالوژۍ برخو پرسونل ته د عامه پوهاوي په پار جوړ شو.
همدا شان، د سمینار وړاندې کوونکوو د یاد سمینار په ارزښت خبرې وکړې او ګډونوالو څخه یې وغوښتل چې په یاد سمینار کې نورې ګټورې تجربې هم خپلې او په عملي چارو کې ترې ګټه پورته کړي.
همداراز، د دې زندان مسوولینو یاد سیمنار د چارو ښه والي او د کارکوونکو د ظرفیت لوړونې په موخه ګټور او غوره ګام وباله او په راتلونکي کې یې دې ته ورته د نورو ښوونیزو برنامو پر دوام ټینګار وکړ.
د یو بل خبر له مخې، د پکتیا ولایت د زندان پرسونل او زندانیانو ترمنځ (خوشحاله ملت ) تر عنوان لاندې د والیبال دوستانه سیالۍ پیل شوې
د دغه ولایت د زندان مسوولین زیاتوي، په یاد زندان کې د ورزش مینه والو زندانیانو او پرسونل د (۸) لوبډلو ترمنځ دوستانه سیالۍ پیل شوې چې موخه یې د دواړو لورو ترمنځ د یوې ښې او سالمې فضا رامنځ ته کول وو، څو له یوې خوا زندانیان د خپګان احساس ونه کړي او له بلې خوا ورته د ورزش زمینه برابره شي او پرمټ یې روحي او جسمي روغتیا او سلامتیا ترلاسه کړي.
په ورته وخت کې، د پکتیا ولایت د زندان زندانیانو د یادو دوستانه سیالیو د برابرولو له امله مسوولینو څخه د مننې ترڅنګ ژمنه وکړله چې د زندان له خوا به په نورو جوړو شویو مثبتو پروګرامونو کې هم د تل په شان برخه واخلي.
ذو القعده الحرام ۱۳/ ۱۴۴۶
د مقام د دفتر ریاست
د اطلاعاتو او عامه اړیکو امریت
