د زندانونو چارو د سمون ادارې د رهبرۍ له خوا ټاکل شوی پلاوی بدخشان او تخار ولایتونو ته سفر وکړ
د زندانونو چارو د سمون ادارې د عمومي رئیس محترم مولوي محمديوسف "مستري" په سپارښتنه، د شمال زون ولايتونو لپاره د محترم مولوي عبدالفتاح په مشرۍ د زندانونو د کاري او اداري چارو ارزولو او ستونزو حلولو په موخه ټاکل شوي پلاوي، تېره ورځ يادو ولايتونو ته سفر کړی او هلته یې د ولايتونو د مقام له محترمو چاراکو، عدلي او قضايي ارګانونو محترمو مسوولينو، امنيتي او کشفي چارو او د زندانونو له محترمو مسوولینو او مديرانو سره د جلا، جلا غونډو په ترڅ کې لیدلي او د اړوندو مسایلو په اړه یې ورسره خبرې اترې کړې دي.
نوموړی پلاوی وايي، چې د خپلې ارزونې په ترڅ کې یې د زندانونو د تعمیراتي، خوړو(اعاشې)، برېښنا او روغتیايي چارو په برخو کې ستونزې برڅېره او د حل لپاره یې له اړوندو ولایتي مسوولینو سره بحث کړی دی.
پلاوي داراز، د يادو زندانونو بنديانو سره هم له نږدې کتلي، د هغوی وضعیت یې ارزولی او د زندانونو مسوولينو ته يې د بنديانو لپاره د اسانتياوو د زیاتولو سپارښتنه کړې ده.
یاد پلاوی وايي: « بندیانو وویل د زندان پرسونل له موږ سره ښه چلند کوي.
د مولوي عبدالفتاح په مشرۍ پلاوی زیاتوي، چې دوی به د ورسپارل شویو ولایتونو د زندانونو د کاري او اداري چارو ارزولو بهير ته دوام ورکوي او هغه ستونزې چې حل یې په اړوندو ولایتونو کې امکان نه لري، له ځان سره به یې د زندانونو چارو د سمون ادارې رهبرۍ ته رالېږدوي، ترڅو یې په مرکز کې د حل لپاره مناسبه پرېکړه وشي.
ربېع الاول- ۳۰/ ۱۴۴۴
د اطلاعاتو او عامه اړيکو ریاست
