د زندانونو چارو د سمون ادارې د مرکزي برخو کارکوونکو ته د لیکونو د تعقیب او څارنې معلوماتي سیسټم په اړه دوه ورځینی ښوونيز سمینار پیل شو
دغه سیمینار چې د نوموړې ادارې د معلوماتي ټکنالوژۍ او مخابرې ریاست له خوا د مرکزي ریاستونو، امریتونو او مدیرتونو د کارکوونکو لپاره جوړ شوی وو، د لیکونو د تعقیب او څارنې د معلوماتي سیسټم (ډیټابیس) په اړه چې د یاد ریاست د باتجربه انجنیرانو له لوري په کمه موده او میعاري ډول جوړ دی، د پوهاوي او کارونې په اړه یې دوه ورځینی ښوونيز سمینار پیل شو
د زندانونو چارو د سمون ادارې د مالي او اداري عمومي رئیس محترم مولوي عبدالهادي مالي "اخندزاده" په دې اړه په جوړو شویو مراسیمو کې چې د ادارې د مقام د دفتر رئیس محترم عبید الله "اخلاص"، د تدارکاتو رئیس محترم میرمحمد "مجدود" او یو شمېر نورو ملکي او نظامي مسوولینو هم شتون درلود ګډونوالو ته په خبرو کې وویل چې اداره تل کوښښ کوي څو د هېواد په مرکز او ولایتونو کې د زندانونو د کارکوونکو لپاره داسې سیسټمونه رامنځ ته کړي چې پر مټ یې په اداري چارو کې دقت، کیفیت او منظم چټکوالی رامنځ ته شي.
دا راز، د مقام د دفتر رئیس محترم عبید الله "اخلاص" د غونډې ګډونوالو ته په خبرو کې زیاته کړه هڅه مو دا وه څو د اداري چارو د منظمې تګلارې په هدف یو میعاري سیسټم رامنځ ته کړو چې په کمه موده کې و توانیدو د معلوماتي ټکنالوژۍ او مخابرې ریاست د باتجربه انجنیرانو له لوري دا سیسټم رامنځ ته کړو.
په پای کې، د معلوماتي ټکنالوژۍ او مخابرې ریاست مسوولینو د یاد ډیټابیس په اړه ګډنوالو ته په خبرو کې وویل:« د لیکونو د تعقیب او څارنې معلوماتي سیسټم چې په ساده شکل سره ډېزاین او په نوې ټکنالوژۍ کې رغول شوی په هر ډول ځیرک ټلیفونونو او کمپیوټرونو کې د کارونې وړ دی چې په ګټې اخیستنې سره به یې د اسنادو د ورکیدو یا له منځه تللو څخه مخنیوی، په وخت سره د مکتبونو او نورو سندونو رسېدنه، د معلوماتو خوندي ساتل او په اداري چارو کې روڼتیا رامنځ ته کړي.»
جمادي الاول ۲۱/ ۱۴۴۵
د مقام د دفتر ریاست
د اطلاعاتو او عامه اړیکو امریت
