د زندانونو چارو د سمون ادارې د مرکزي برخې له خوا د سرپل ولایت د زندان له ښځینه محبس سره نغدي مرسته وشوه

د هېواد زندانونو ته د دغې ادارې د رهبرۍ او مسوولینو د پاملرنې په دوام، دا ځل د ادارې د اړوندې مرکزي برخې له خوا د سرپل ولایت د زندان د ښځینه محبس له هغو محبوسینو میندو سره د یو اندازه نغدو پېسو مرسته وشوه، چې ماشومان یې ورسره په محبس کې اوسېږي.
د سرپل د زندان امر محترم ملا ګل محمد "بلخي" په دې اړه د جوړو شویو مراسمو پرمهال وویل، دا مرسته شوې پېسې د ادارې د رهبرۍ د شفقت له مخې او د نوموړو میندو اړتیا ته په کتو چمتو شوې وې، چې پر هغوی یې په پوره امنتولۍ او روڼه توګه وويشلې.
د سرپل ولایت د زندان یادو محبوسینو د خوښۍ په څرګندولو د ادارې له رهبرۍ او مسوولینو څخه مننه وکړه.
د یو بل خبر له مخې، د سرپل ولایت د زندان په مالي لګښت د ځینو ځایونو رغنیزې چارې پیل شوې دي، چې د مسوولینو په وینا په بشپړېدو سره به یې په یاد زندان کې لازمې اسانتیاوې رامنځته شي.

جمادي الثاني ۱۲/ ۱۴۴۵
د مقام د دفتر ریاست
د اطلاعاتو اوعامه اړيکو امریت