د زندانونو چارو د سمون ادارې د ګومارنو، تشکيلاتو او کاري نظم کمېسيون په غونډه کې پر يو شمېر مسايلو خبرې وشوې
نوموړي کمېسيون د خپلو هڅو په دوام، نن(دوشنبې) يو ځل بيا هم د يادې ادارې د پالېسۍ و مسلکي مرستيال محترم قاري عبدالله "همدرد" په مشرۍ او د نظامي مرستيال محترم پاسوال قاري حبیبالله "بدر"، د مقام سلاکار محترم الحاج اسدالله "مولانا"، د کابل د زندانونو چارو د سمون رئیس محترم مولوي عبدالله "حقیق"، د مقام د دفتر رئیس محترم عبیدالله "اخلاص"، د اداري او خدماتو رئیس محترم مولوي عبدالمالک "خاکسار" او د پالېسۍ او مسلکي معاونیت د دفتر امر محترم خلیل الله "بکتاش" په ګډون غونډه جوړه او پر اړوندو موضوعګانو يې خبرې اترې وکړې.
داراز، په دې غونډه کې چې د تدارکاتو او مالي او حسابي رياستونو استازو هم شتون درلود، د ادارې لپاره د تېلو د خريدارۍ په برخه کې د شتو ستونزو تر ارزونو او نورو اړتياوو ته د رسېدنې په هکله تر بحث او پرېکړو وروسته اړوندو برخو ته لازمې لارښوونې وشوې.
د يادولو وړ ده، چې د زندانونو چارو د سمون اداره په دې هڅه کې ده، څو د اسلامي اصولو او شريعت په رڼا کې، د هېواد د نافذه قوانينو مطابق، د ا.ا.ا د پالېسۍ او نړيوالو معيارونو سره سم خپلې مديريتي چارې په ښه توګه پرمخ يوسي او د حکومتولۍ په برخه کې ښه ممثله اداره وي.
صفرالمظفر- ۲۹/ ۱۴۴۴
د اطلاعاتو او عامه اړیکو رياست
