د زندانونو چارو د سمون ادارې عمومي رئیس په مشرۍ پلاوي د کابل ولایت د څرخي پله د مرکزي محبس څخه لیدنه وکړه
د زندانونو چارو د سمون ادارې عمومي رئیس په مشرۍ پلاوي د کابل ولایت د څرخي پله د مرکزي محبس څخه لیدنه وکړه
د زندانونو چارو د سمون ادارې د عمومي رئیس محترم الحاج مولوي محمد یوسف "مستري" په مشرۍ پلاوي چې د ادارې د ښوونې او بیا روزنې رئیس محترم مولوي نظر محمد "ناصري"، د نوموړي محبس رئیس محترم مولوي خالقداد"رحمت"، د اقتصادي برنامو او ستراتیژیکو اړیکو رئیس محترم عبیدالله "اخلاص" او شمېر نور مسوولین ورسره مل وو، د یاد زندان د صنعتې برخو، کتابتون او د ادارې ۵۰ بستریز روغتون څخه لیدنه وکړه او له اړوندو مسوولینو سره خبرې وکړې.
د زندانونو چارو د سمون ادارې عمومي رئیس محترم الحاج مولوي محمدیوسف مستري د څرخي پله مرکزي محبس صنعتي برخو څخه د ارزونې ترڅنګ اړوندو مسوولینو ته یې سپارښتنه وکړه چې د تخنیکي وسایلو په ساتنه کې جدي پاملرنه وکړي او له نوموړو څخه وغوښتل چې د زندانیانو په روزنه کې خپلې هڅې لا ګړندۍ کړي څو نوموړي کسان د بند مودې په پوره کېدو سره سم د یو کاسب وګړي په توګه خپلې کورنۍ او ټولنې ته د خدمت وړ وکرځي .
داراز، محترم الحاج مولوي محمد یوسف مستري د نوموړي زندان د کتابتون څخه هم لیدنه وکړه او د نوموړي کتابتون مسوولینو ته سپارښتنه وکړه چې د کتابونو په ساتنه او مطالعې ته د زندانیانو هڅونې په برخه کې کوټلي ګامونه واخلي څو زندانیان له دې طلايي فرصت څخه ګټه پورته او خپل وخت بې ځایه تېر نه کړي.
په ورته وخت د زندانونو چارو د سمون ادارې عمومي رئیس په داسې حال کې چې د دې ادارې د روغتیا رئیس محترم ډاکټر سید احمد اسحاقزی وسره مل وو، د ادارې ۵۰ بستریز روغتون روغتیایي کارکوونکو سره په لیدنه کې په خپلو خبرو کې وویل چې د ناروغانو ښي درملنې او د روغتون پاکوالي ته جدې پاملرنه وکړي.
نوموړي زیاته کړه چې دا زمونږ او ستاسو مسوولیت دی چې د زندانیانو او پرسونل روغتیا ساتنې ته ځانګړې پاملرنه وکړو او پدې برخه کې نه ستړې کېدونکې هلې ځلې وکړو.
داراز، محترم الحاج مولوي محمدیوسف مستري د نوموړي روغتون مسوولینو سره په کتنه کې د هغوی غوښتنو او ستونزو اورېدلو ترڅنګ د نوموړي روغتون اداري شعبې، درملتون، لابرتوار، بسترخونې ، واټونه او بیلابیلې برخې وارزولې او د ستونزو حلولو او لازمو اسانتیاوو برابرولو په پار یې اړوندو مسوولینو ته لازمې سپارښتنې وکړې.
همدا راز، د زندانونو چارو د سمون ادارې عمومي رئیس د ادارې ۵۰ بستریز روغتون د بستر اړوندو روغتیايي مسوولینو ته لارښوونه وکړه چې د بندي ناروغانو په درملنه کې د خپلو ټولو امکاناتو څخه په ګټې اخیستنه کې له هیڅ راز هلو ځلو څخه دریغ ونه کړي.
د یادولو ده چې د زندانونو چارو د سمون ادارې رهبري او مسوولین، په دوامدار ډول د هېواد د ټولو ولایتونو د زندانونو او توقیفخونو د وضعیت ارزول، د مثبتو چارو غښتلتیا او ستونزو ته یې پروخت رسېدنه خپل مسوولیت ګڼي او په دې لاره کې خپلو هڅو ته دوام ورکوي.
ربیع الاول ۲۹/ ۱۴۴۶
د مقام دفتر ریاست
د اطلاعاتو او عامه اړیکو امریت
