د زندانونو چارو د سمون ادارې نظامي مرستیال او مل پلاوي یې د کابل ولایت د څرخي پله مرکزي محبس څخه لیدنه وکړه

د نظامي چارو مرستیال محترم لوی پاسوال قاري حبیب الله "بدر" په داسې حال کې چې د ادارې د تعمیراتو رئیس محترم الحاج عبدالرحمن"عابد"، د معلوماتي ټکنالوژۍ او مخابرې رئیس محترم انجینر عبیدالله "اخندزاده" او یو شمېر نور مسوولین هم ورسره وو،  د څرخي پله مرکزي  محبس مسوولینو سره په اړوندو مسایلو بحث وکړ.
دا راز، د نظامي چارو مرستیال د یاد محبس او د روغتیا برخې مسوولینو سره په لیدنه کې نوموړو ته زیاته کړه چې د ژمي موسم په راتلو سره د محبوسینو لپاره د ګرمولو توکو او د هغوی د روغتیا ساتنې په برخه کې خپله پاملرنه لا زیاته کړي څو محبوسین په دې موسم کې له ناروغیو څخه خوندي پاتې شي.
په ورته وخت کې، محترم لوی پاسوال قاري حبیب الله بدر د تعمراتو او تکنالوژۍ مسوولینو ته چې په دې لیدنه کې ورسره مل وو لارښوونه وکړه چې د محبس د تعمیراتي برخې چې تنظیم او رغونې ته اړتیا لري ورغوي او هغه برخو کې چې کېمرې، PCO او انټرنیټ لګولو ته اړتیا وي ولګوي څو هم د امنیت په ټنګښت او هم د محبوسینو لپاره په محبس کې د ژوند کولو اسانتیاوې رامنځ ته شي. 
همدا راز، محترم لوی پاسوال قاري حبیب الله بدر په مشرۍ پلاوي د نوموړي محبس د پرسونل او محبوسینو لپاره د خوړو (اعاشې)، اباتې او پخلنځي ترڅنګ یې د دې محبس د امنیتي ټاورونو، قراولونو، پوستو او نورو امنیتي برخو وضعیت له نږدې وارزاوه او د زندانیانو لا خوندي امنیت په پار یې اړوندو مسوولینو ته لازمې سپارښتنې وکړې.

جمادي الاول۱۲/ ۱۴۴۵
د مقام د دفتر ریاست 
د اطلاعاتو او عامه اړیکو امریت