د زندانونو چارو د سمون ادارې په رهبرۍ ناسته کې د ناروغو زندانیانو لپاره د خوړو ځانګړې مینو په اړه بحث وشو
دغه ناسته، چې تېره ورځ د نوموړې ادارې د عمومي رئیس محترم مولوي محمدیوسف "مستري" په مشرۍ او د پالېسۍ او مسلکي چارو مرستیال محترم قاري عبدالله "همدرد"، د نظامي چارو مرستیال محترم لوی پاسوال قاري حبیب الله "بدر"، د مالي او اداري عمومي رئیس محترم مولوي عبدالهادي مالي "اخندزاد"، د نظامي معاونیت د ارکان رئیس محترم پاسوال الحاج اسدالله "مولانا" او د مرکزي ملکي او نظامي برخو د رئیسانو، امرینو او یو شمېر مسوولینو په ګډون جوړه شوې وه، په سر کې د ادارې په غوښتنه او د ریاست الوزرا د عالي مقام په منظورۍ د بګرام د زندان د ریاست لپاره محترم حبیب الرحمان منصور او د کورني تفتیش ریاست لپاره محترم فضل احمد احمدي د ګومارنې حکمونه ولوستل شول او د پېژندنې ترڅنګ ورته په چارو کې د خیر او بریالیتوب دعا وشوه.
په ورته مهال، په یاده ناسته کې د بګرام د زندان د چارو تنظیمول، د ادارې د روغتیا ریاست د طبي پرسونل د ارزونې د پایلو شریکولو، د ناروغو زندانیانو لپاره د خوړو معیاري مینو یا تابلو ترتیبولو او د کلني پلان پربنسټ د نظامي پرسونل لپاره د مسلکي او ښوونیزو کورسونو جوړولو په اړه هراړخیز بحث او اړوندو مسوولینو ته یې په هکله لازمې سپارښتنې وشوې.
داراز، د نوموړې ناستې په ترڅ کې یو شمېر ګډونوالو هم په اجنډا کې د شاملو ځینو نورو مهمو مسایلو په اړه خپل نظرونه تبادله کړل، چې د زندانونو چارو د سمون ادارې د عمومي رئیس محترم مولوي محمدیوسف "مستري" له خوا یې تر اورېدو وروسته په هکله د شرعي اصولو او تقنیني اسنادو له مخې لازمې پرېکړې وشوې.
ربېع الثاني ۲۳/ ۱۴۴۵
د مقام د دفتر ریاست
د اطلاعاتو او عامه اړیکو امریت
