د زندانونو چارو د سمون ادارې یوه لوړ پوړي پلاوي د کابل له نشه يي توکو سره د مبارزې توقیفخونې د توقیفیانو اعتصاب پایته ورساوه
د زندانونو چارو د سمون ادارې د نظامي مرستیال محترم پاسوال قاري حبیب الله "بدر" په مشرۍ او د ادارې د مقام سلاکار محترم مولوي اسدالله "مولانا" او یوشمېر نورو مسوولینو په ګډون یوه لوړپوړي پلاوي، تېره ورځ د کابل له نشه يي توکو سره د مبارزې په توقیفخونه کې د دوسیو پر وخت نه څېړلو له امله د توقیفیانو له خوا د نه خوړو اعتصاب پایته ورساوه.
په ورته وخت کې، د محترم بدر او ورسره پلاوي په غوښتنه د همدې ستونزې د حل لپاره یادې توقیفخونې ته د عدلي او قضايي اورګانونو راغلیو استازیو نوموړو توقیفیانو سره له نږدې ولیدل، د هغوی روغتیايي وضعیت یې وارزاوه، د هغوی شکایتونه، ستونزې او روا غوښتنې یې واورېدې او ژمنه یې ورسره وکړه، چې د زندانونو چارو د سمون ادارې په همکارۍ به د دوی د وضعیت ښه والي، شکایتونو ته د رسېدنې، د ستونزو د حل او دوسیو پروخت څېړلو لپاره خپلې ګډې هڅې ګړندۍ کړي، چې دا ژمنه د دغو توقیفیانو د رضایت لامل وګرځېده.
جمادي الاول ۱۸/ ۱۴۴۴
د اطلاعاتو او عامه اړیکو ریاست
