د غزني د مرکزي زندان رئیس د دغه ولایت د مالستان ولسوالۍ له توقیفخونې لیدنه وکړه

د محترم محمدهاشم "حقاني" په مشرۍ د یو شمېر ملکي او نظامي مسوولینو څخه جوړ یوه پلاوي تېره ورځ، د غزني ولایت مالستان ولسوالۍ ته د سفر په ترڅ کې، د یادې ولسوالۍ له توقیفخونې څخه لیدنه وکړه.
په دې لیدنه کې لومړی د نوموړې توقیفخونې مسوولینو پلاوي ته د ترسره شویو فعالیتونو، لاسته راوړنو او ځینو ستونزو په هکله معلومات وړاندې کړل، چې پلاوي د یادو فعالیتونو او لاسته راوړنو د ستاینې ترڅنګ، د ستونزو د حل لپاره ژمنه وکړه.
دغه راز، پلاوي د نوموړې ولسوالۍ د توقیفخونې توقیفیانو سره له نږدې ولیدل، هغوی په خپلو خبرو کې د دې توقیفخونې د مسوولینو له خوا د ښه چلند او برابرو شویو اسانتیاوو له امله مننه وکړه، خو له پلاوي یې وغوښتل، څو د دوی ځینو مهمو او روا غوښتنو ته رسېدنه وکړي، چې پلاوي ورته تر خپله وسه د رسېدنې ډاډ ورکړ.
یاد پلاوی ژمن دی، چې دوی به په دوامداره توګه د غزني ولایت د زندان او توقیفخونو وضعیت څاري او ستونزو ته به یې پروخت رسېدنه کوي.

ربېع الاول-۱۶/ ۱۴۴۴
د اطلاعاتو او عامه اړیکو ریاست