د ننګرهار ولایت د مرکزي زندان د ګرد چاپېره سیمو د تلاشۍ پرمهال یوه اندازه وسلې او مخربې وسیلې ترلاسه شوې
د ننګرهار ولایت د مرکزي زندان، ملي امنیت ریاست او امنیه قومندانۍ د کشفي او امنیتي برخو استازو په ګډه همکارۍ او همغږۍ، تېره ورځ د یوه منظم او اوصولي پلان له مخې د یاد زندان ګرد چاپېره سیمې په قانوني ډول تلاشي کړې، چې په پایله کې یې څو میله وسلې، یوه اندازه غیر اخلاقي توکي او تخریبي وسیلې ترلاسه او په رسمي توګه یې اړوندو برخو ته د لا نورو اجرااتو لپاره وسپارلې.
د یادونې وړ بولو، چې دغه تلاشي د نوموړي زندان او بندیانو د امنیتي تدابیرو د زیاتولو او خوندیتوب لپاره ترسره شوې وه.
ربېع الثاني ۱۱/ ۱۴۴۴
د اطلاعاتو اوعامه اړيکو رياست
