د پروان او کاپیسا ولایتونو د زندانونو (۲۳۶) تنه زندانيان د عفوې او تخفیف څخه برخمن شول
د ا.ا.ا. د سترې محکمې د عالي مقام د هدایت او تائیدۍ پر بنسټ د لوی اختر په مناسبت د پروان ولایت د زندان (۷۱) تنه زندانیان عفوه او خوشې او (۱۰۰) تنو نورو ته د بند به موده کې تخفیف ورکړل شو.
په ورته وخت کې، د کاپیسا ولایت د زندان (۴۶) تنه زندانیان عفوه او خوشې او (۱۹) تنو نورو ته د بند به موده کې تخفیف ورکړل شو.
په دې اړه جوړو شويو مراسمو کې، چې د زندانونو چارو د سمون ادارې د ارشاد او دعوت رئیس محترم مولوي صدیق الله صدیقي، د عفوي او تخفيف د فرمانونو د پلي کولو امر محترم مولوي شهیداللّٰه "خالد" او د دغه ولایت د سیمه ییزو اړوندو مسوولینو ګډون درلود، ویناوالو په خپلو خبرو کې وويل: د اسلامي امارت راتګ سره اوس د نوموړې ادارې تر چتر لاندې زندانونه پر مدارسو او اصلاح ځایونو بدل شوي او هغه دیني، عصري او حرفوي زده کړې چې زندانیان د بند په موده کې ترلاسه کوي، نو هیله ده چې له برکته یې په اخلاقو او چلند کې نېکه اصلاح او د جرم له بیا تکراره ډډه وکړي.
بلخوا، محترم مولوي شهیداللّٰه "خالد" وویل، د عفوې او تخفیف دا بهیر د اسلامي عدالت له روحیې سره سم په روڼه توګه تطبیق شو، چې د زندانيانو د اصلاح او ټولنې ته د سالمو وګړو په توګه د دوی د ورګرځېدو یوه مهمه برخه ده.
په ورته وخت کې، خوشې شویو زندانیانو د زندانونو چارو د سمون ادارې تر چتر لاندې د پروان او کاپیسا ولایتونو د زندانونو د مسوولینو د ښه چلند او په زندانونو کې د ښو دیني او عصري علومو، کسب زده کړو او نورو اصلاحي برنامو د عملي کولو له امله د خوښۍ په څرګندولو سره وویل، هڅه به وکړي چې د ترلاسه کړو زده کړو پرمټ به اسلام، هېواد او خلکو ته خدمت وکړي.
ذوالحجة الحرام ۷/ ۱۴۴۶
د مقام د دفتر ریاست
د اطلاعاتو او عامه اړیکو امریت
