ولایتي خبرونه: (جوزجان، پکتیکا) د جوزجان ولایت په زندان کې د زندانیانو ترمنځ د (الحق المبین )کتاب تر نامه لاندې سیالۍ پای ته ورسېده
په دغه سیالۍ کې، چې د دې ولایت د زندان (۱۲۰) تنو زندانیانو برخه اخیستې وه، د هغوی د فکري روزنې او د مطالعې فرهنګ د ودې په موخه د البرز فکري او فرهنګي ادارې او د نوموړي زندان د ښوونې او بیا روزنې امریت په همکارۍ په شفافه توګه ترې ازموینه واخیستل شوه.
په دې اړه جوړو شویو مراسمو کې، د جوزجان ولایت د زندان امر محترم عبد الباري "مخلص"، د نوموړي ولایت د استخباراتو، اطلاعاتو او کلتور رئیسانو په ګډون یو شمېر سیمه ییزو مسوولینو هم شتون درلود، ویناوالو د مطالعې پر ارزښت خبرې وکړې او زندانیانو څخه یې وغوښتل چې خپل وخت بې ځایه تېر نه کړي او شته فرصت څخه په ګتې اخیستنې سره مطالعه وکړي.
همدا راز، د یاد زندان امر له زندانیانو څخه وغوښتل چې د دیني زده کړو په ترلاسه کولو او د پوهې په لوړولو کې خپلې هڅې لا زیاتې کړي.
د یادونې وړ ده، چې په یاده سیالۍ کې (۱۲۰) تنو زندانیانو برخه اخیستې وه، چې د ازموینې له پایلو وروسته (۱۵) تنو غوره ګډونوال ته د نقدي جایزې، جامو او د رحیق المختوم کتابونه د ډالۍ په توګه ورکړل شول.
د بو بل خبر له مخې، د پکتیکا ولایت د زندان پرسونل او زندانیانو ترمنځ د والیبال دوستانه سیالۍ ترسره شوې
د دغه ولایت د زندان مسوولین زیاتوي، تېره ورځ په یاد زندان کې د ورزش مینه والو زندانیانو او پرسونل پنځو لوبډلو ترمنځ د والیبال دوستانه سیالۍ چې څلور ورځې یې دوام درلود، پای ته ورسېده.
د نوموړي زندان امر محترم مولوي احسان الله "صلاح الدین" په وینا؛ دغو سیالیو موخه د دواړو لورو ترمنځ د یوې ښې او سالمې فضا رامنځ ته کول وو، څو له یوې خوا زندانیان د خپګان احساس ونه کړي او له بلې خوا ورته د ورزش زمینه برابره شي څو پرمټ یې روحي او جسمي روغتیا او سلامتیا ترلاسه کړي.
په ورته وخت کې، د پکتیکا ولایت د زندان زندانیانو د یادو دوستانه سیالیو د برابرولو له امله مسوولینو څخه د مننې ترڅنګ ژمنه وکړله چې د زندان له خوا به په نورو جوړو شویو مثبتو پروګرامونو کې هم د تل په شان برخه واخلي.
ربیع الاول ۶/ ۱۴۴۷
د مقام د دفتر ر یاست
د اطلاعاتو او عامه اړیکو امریت
