ولایتي خبرونه (پکتیا، هلمند) د پکتیا ولایت له زندان څخه  (۵۰) تنو محبوسینو د سواد زده کړو دوره پای ته ورسوله

دغه دوره چې د یاد زندان او د دې ولایت د پوهنې ریاست په همکارۍ په مخ وړل کېده، نن یې د پای غونډې په مراسمو کې د زندان رئیس محترم قاري عبدالغني "عادل" په داسې حال کې چې د دغه ولایت د استیناف محکمې رئیس محترم مفتي عبدالله "خالد" او یو شمېر نورو مسوولینو هم شتون درلود، د دوی د فراغت مبارکي وویله او زیاته یې کړله، چې په پام کې لري په دې زندان کې نورو ښوونیزو برنامو ته هم مناسبه زمینه برابره کړي.

همداشان، د یادو مراسمو ګډونوالو هم په زندان کې د دا ډول برنامو پرمخ وړل یو مثبت ګام وباله او د زندان له رهبرۍ څخه یې د مننې تر څنګ د نورو ګټورو برنامو پر عملي کولو ټینګار وکړ.

په پای کې، یاد مراسم فارغو شویو محبوسینو ته د تصدیق پاڼو په ورکړې او دعايې په کولو سره پایته ورسېدل.

د یو بل خبر له مخې، د هلمند ولایت د سنګین ولسوالۍ د توقیفخونې له رغنیزو چارو څخه د دې ولایت د زندان او ښار جوړونې مسووولینو لیدنه وکړله

د دې ولایت د زندان او ښار جوړونې مسووولینو د سنګین ولسوالۍ د توقیفخونې روانې رغنیزې چارې له نږدې  ولیدلې او کارکوونکو ته یې د چارو په ښه او بنسټېز ډول د ترسره کوولو سپارښتنه وکړله.

د نوموړو مسوولینو په وینا، دغه چارې د زندانونو چارو د سمون ادارې په مالي لګښت جوړېږي چې پرمټ به یې هم پرسونل ته د کار کولو ښه فضا او هم توقیفیانو ته د اوسېدو مناسبه زمینه او لازمې اسانتیاوې برابرې شي.

رمضان المبارک ۱/ ۱۴۴۶

 د مقام د دفتر ریاست

د اطلاعاتو او عامه اړیکو امریت