د کابل ولایت د څرخي پله د ښځینه محبس له روغتیايي کلینیک سره د روغتیایي توکو مرسته وشوه
یاده مرسته د زندانونو چارو د سمون ادارې په هڅو او د همکارو بنسټونو په همکارۍ شوې، چې په کې د مکروب ضد، د درد ضد او یو شمېر نورو طبي درملو ترڅنګ د ماشومانو لپاره پمپرز شامل دي، چې د دې محبس د روغتیايي کلینیک مسوولینو ته وسپارل شول.
نوموړو مسوولینو هم د خپلو خبرو پرمهال په داسې حال کې، چې د دغې ادارې د اقتصادي برنامو او ستراتېژیکو اړیکو رئیس محترم ډاکټر سیداحمد "اسحاقزي" او د روغتیا رئیس محترم مولوي عبداللطیف "سجاد" هم شتون درلود له یادې مرستې مننه وکړه او د ورته نورو توکو د مرستو او همکاریو پر دوام یې ټینګار وکړ.
د یو بل خبر له مخې، په افغانستان کې د ملګرو ملتونو د مرستندویه ادارې یا یونیسف دفتر له لوري د کندوز ولایت د ماشومانو د اصلاح او روزنې له مرکز سره د قلمونو، کتابچو، لیکدړو(تختو) او یو شمېر نورو توکو په ګډون یو اندازه مرسته شوې قرطاسیه د یاد مرکز مسوولینو ته وسپارل شوه، چې نوموړو مسوولینو له یادې مرستې د خوښۍ په څرګندولو سره زیاته کړه چې یاد توکې به په پوره امانتولۍ او روڼه توګه د دې مرکز پر محجوزینو وویشي.
جمادي الاول ۲۵/ ۱۴۴۵
د مقام د دفتر ریاست
د اطلاعاتو او عامه اړیکو امریت
