د زندانونو چارو د سمون ادارې د اقتصادي برنامو رئیس او د عامې روغتیا محترم وزارت استازي د کندهار د مرکزي زندان له رئیس سره وکتل
د دغې ادارې د اقتصادي برنامو رئیس محترم ډاکټرسیداحمد "اسحاقزي" او د عامې روغتیا محترم وزارت له خوا په روغتیايي برخه کې د هېواد د زندانونو لپاره استازي ډاکټر فهیم "پیغام" کندهار ته د خپل سفر په ترڅ کې، د دې ولایت د مرکزي زندان له رئیس ملا نعمت الله "سراجي" سره په دغې کتنه کې، د یاد زندان ټولو زندانیانو او په نشه یي توکو د روږدو کسانو د درملنې په هکله هراړخیزه بحث او د هغوی د ښې روغتیا په هکله لازمې پرېکړې وشوې.
په ورته وخت کې، د کندهار ولایت د مرکزي زندان رئیس محترم ملا نعمت الله "سراجي" ډاډ ور کړ، چي په دغه زندان کې د روږدو کسانو د ښې درملنې په موخه د روغتیا په برخه کې د ملي او نړیوالو ارګانونو سره په همغږۍ به ښه او ګټوره تګلاره جوړه او پرمټ به یې روږدو کسانو ته مناسب روغتیایي خدمتونه وړاندې کړي.
د یادولو وړ بولو، چې د هېواد د ټولو زندانونو په روغتیايي مرکزونو کې د تېر شاوخوا یوه کال په موده کې د نشه يي توکو له روږدتیا څخه د خلاصون لپاره زرګونه تنه معتادینو روغتیا ترلاسه او له خپلو کورنیو سره د سالمو وګړو په توګه یوځای شوي دي.
ربېع الاول- ۸/ ۱۴۴۴
د اطلاعاتو او عامه اړیکو ریاست
