د زندانونو چارو د سمون ادارې رهبرۍ پلاوي د کونړ ولایت له زندانه لیدنه وکړه
د زندانونو چارو د سمون ادارې د عمومي رئیس محترم مولوي محمد یوسف "مستري" په مشرۍ او د مقام د سلاکار محترم مولوي اسدالله "مولانا"، د مقام د دفتر رئیس محترم عبيدالله "اخلاص"، د ارشاد او دعوت رئیس محترم مولوي صديق الله "صديقي" او د ښوونې او روزنې رئیس محترم مولوي عبدالوارث "سادات" په ملتیا یو لوړپوړی پلاوی، نن(جمعه) کونړ ولایت ته په رسمي سفر ولاړ او د دغه ولایت د زندان له مسوولینو او پرسونل سره یې پر اړوندو مسایلو خبرې اترې وکړې.
دغه راز، پلاوي د نوموړي ولايت د يو شمېر مسوولينو او پرسونل چارې وارزولې او د لاښه والي لپاره يې ورته لازمې لارښوونې وکړې.
همداشان، ياد پلاوي د کونړ ولايت د زندان له بېلابېلو برخو د ارزولو پرمهال د دې زندان له بنديانو سره هم وکتل، د هغوی خبرې، ستونزې او غوښتنې يې واورېدلې او د قانون او اصولو په چوکاټ کې يې ورته د رسېدنې ژمنه وکړه.
د محترم مستري په مشرۍ د رهبرۍ پلاوي غړو، په دغه زندان کې د ښوونیزو، روزنيزو، دعوت او ارشاد او نورو اصلاحي پروګرامونو بهیر له نږدې وارزاوه او مسوولین یې په دې برخو کې د پاملرنې زیاتولو ترڅنګ، د بندیانو د اعاشې، صحت او نور بشري او اسلامي حقونو رعایتولو ته ځير کړل.
د زندانونو چارو د سمون ادارې رهبري او مسوولین تل کوښښ کوي، چې د هېواد له ټولو ازادۍ سلب مرکزونو څخه لیدنه وکړي، وضعیت، ستونزوې او چارې یې وارزوي او د ښه والي او رسېدنې لپاره ورته لازمې حللارې پیدا او عملي کړي.
ربېع الثاني ۱۶/ ۱۴۴۴
د اطلاعاتو او عامه اړیکو ریاست
