د زندانونو چارو د سمون ادارې یوه پلاوي د کابل ولایت له نشه يي توکو سره د مبارزې له توقیفخونې څخه لیدنه وکړه
د زندانونو چارو د سمون ادارې د عمومي رئیس محترم مولوي محمديوسف "مستري" په سپارښتنه، د ادارې د نظامي چارو معاونیت د ارکان رئیس محترم پاسوال الحاج اسدالله "مولانا" د یوه پلاوي په مشرۍ د کابل ولایت له نشه يي توکو سره د مبارزې توقیفخونې له مسوولینو سره ولیدل او په اړوندو مسایلو یې ورسره بحث وکړ.
د محترم مولانا په مشرۍ پلاوي د کابل ولایت له نشه يي توکو سره د مبارزې توقیخونې د خوړو(اعاشې)، اباتې، پخلنځي، برېښنا بېلا بېلې برخې او تعمیراتي او روغتیايي چارې وارزولې او د شتو ستونزو د حل لپاره یې له اړوندو مسوولینو سره سلا مشورې وکړې.
داراز، پلاوي د نوموړې توقیفخونې توقیفیانو سره هم له نږدې وکتل، د هغوی وضعیت یې وارزاوه او د اسانتياوو پر زیاتولو او ستونزو او روا غوښتنو ته یې د رسېدنې په موخه مسوولينو ته لازمې لارښوونې وکړې.
ربیع الاول ۱۷/ ۱۴۴۵
د مقام د دفتر ریاست
د اطلاعاتو او عامه اړیکو امریت
