د زندانونو چارو د سمون ادارې د نظامي مرستیال په مشرۍ پلاوي د پنجشیر ولایت له زندان لیدنه وکړه

د دغې ادارې د نظامي چارو مرستیال محترم لوی پاسوال قاري حبیب الله "بدر" په داسې حال کې چې د ادارې له عدلي او قضایي اورګانونو سره د اړیکو رئیس محترم مولوي عبدالله "حقیق"، د پېژند عمومي مدیر محترم مولوي شامحمد "مفکر" او  یو شمېر نور مسوولین هم ورسره وو پنجشیر ولایت ته سفر وکړ او هلته یې د یاد زندان له مسوولینو سره د کتنې په ترڅ کې د نوموړي د زندان د عمومي وضعیت په اړه ورسره وغږېده.

داراز، د نظامي چارو مرستیال په مشرۍ پلاوي د دې زندان له زندانیانو سره هم ولیدل د هغوي ستونزې او غوښتنې یې له نږدې واورېدې او حل په موخه یې اړوندو مسوولینو ته لازمې لارښوونې وکړې.

په ورته وخت کې، محترم قاري بدر د یاد زندان مسوولینو ته په خبرو کې زیاته کړه: «زموږ او ستاسو دنده ده چې زندانیانو ته د ژوند کولو لازمو اسانتیاوو ترڅنګ ورته د دیني، عصري او حرفوي زده کړو زمینه برابره کړو څو پرمټ یې د بند مودې تر پایته رسېدو وروسته خپلې کورنۍ او ټولنې ته د خدمت وړ وګرځي».

داراز، محترم لوی پاسوال قاري حبیب الله بدر په مشرۍ پلاوي د پرسونل او زندانیانو لپاره د خوړو(اعاشې)، اباتې، پخلنځي او روغتیایې برخو څخه د لیدنې ترڅنګ یې د دې زندان د امنیتي ټاورونو، قراولونو، پوستو او نورو امنیتي برخو وضعیت له نږدې وارزاوه او  د زندانیانو لا خوندي امنیت په پار یې اړوندو مسوولینو ته لازمې سپارښتنې وکړې.

په پای کې، د ادارې د خوندیتوب او  د کارکوونکو د دقیقې پژندنې په پار د زندانونو چارو د سمون ادارې د نظامي معاونیت له لورې د یاد ولایت د زندان د ملکي او نظامي پرسونل بایو مټریک هم ترسره شو.

د یادولو ده، چې د زندانونو چارو د سمون ادارې مسوولین، په دوامدار ډول د هېواد زندانونو د وضعیت ارزول، د مثبتو چارو غښتلتیا او ستونزو ته یې پروخت رسېدنه خپل مسوولیت ګڼي.

ربیع الثاني ۲۵/ ۱۴۴۵

د مقام د دفتر ریاست

د اطلاعاتو او عامه اړیکو امریت