د ا.ا.ا. د چارو ادارې عمومي رئیس له مرکزي زندانه ليدنه وکړه

د ا.ا.ا. د چارو ادارې عمومي رئیس محترم شېخ الحدیث مولوي نورالحق  "انور" په داسې حال کې، چې د زندانونو چارو د سمون ادارې عمومي رئیس محترم الحاج مولوي محمدیوسف "مستري"، د دې ادارې د نظامي چارو مرستیال محترم لوی پاسوال قاري حبیب الله "بدر"، د بشري سرچینو رئیس محترم مولوي ضیاءالرحمن "سعید"، د کابل ولایت د توقیفخونو رئیس محترم قاري محمد ګل "جګرخون" او یو شمېر نورو مسوولینو یې ملتیا کوله، د کابل ولایت د څرخي پله مرکزي زندان څخه د لیدنې پرمهال د دې زندان له محبوسینو او توقیفیانو سره وکتل او د هغوی د حال پوښتنه یې وکړه.

نوموړو محبوسینو او توقیفیانو د چارو ادارې عمومي رئیس سره په دې کتنه دوی ته د زندانونو چارو د سمون ادارې له پاملرنې او ورسره د نېک چلند له امله د رضایت په څرګندولو وویل، دلته د دوی ټول انساني او شرعي حقونه په ښه توګه رعایت کېږي او له هېڅ راز کړاو او تکلیف سره مخ نه دي.

په ورته وخت کې، د زندانونو چارو د سمون ادارې عمومي رئیس محترم الحاج مولوي محمدیوسف "مستري" د چارو ادارې عمومي رئیس ته د ښه راغلاست  ویلو ترڅنګ، نوموړي ته ډاډ ورکړ چې د دغې ادارې په ټولو اړوندو زندانونو کې زندانیانو ته د دیني او عصري علومو، ښوونیزو او روزنیزو پروګرامونو او حرفوي زده کړو په ګډون نورې لازمې اسانتیاوې برابرې شوې او د دې ادارې ملکي او نظامي مسوولین او پرسونل شپه او ورځ د مربوطه چارو د ښه پرمخ وړلو او د یادو اسانتیاوو او امکاناتو پرمټ د زندانیانو د ښې ساتنې او پالنې په موخه نه ستړې کېدونکې هلې ځلې کوي.

داراز، د چارو ادارې عمومي رئیس په دې کتنه کې یادو محبوسینو او  توقیفیانو ته وویل، زندان د مجرم لپاره د عبرت اخیستلو، د جرم له بیا تکراره د ډډه کولو او د ازادۍ سلبېدو په ګډون د نورو پایلو څخه د خبرېدو ځای دی، خو هغه د محترم مولوي محمدیوسف "مستري" د خبرو په تایید سره زیاته کړه، «له نېکه مرغه اوس چې د زندانونو چارو د سمون ادارې اړوند زندانونه په ډېرو ښو ښوونیزو او روزنیزو امکاناتو سمبال دي، نو زه ډاډه یم چې له هغو څخه د برخمنېدو له امله به تاسو له بنده تر ازادېدو وروسته ترې ښه ګټه واخلئ». 

محترم شېخ الحدیت مولوي نورالحق "انور" د زندانونو چارو د سمون ادارې له خوا د زندانیانو لپاره د ترسره شویو  فعالیتونو په اړه خوښي وښوده او له خپل اړخه یې یادې ادارې سره د هر راز مرستې ژمنه وکړه.

په پای کې د دغې ادارې عمومي رئیس محترم الحاج مولوي محمدیوسف "مستري"  د چارو ادارې له دې ژمنې مننه وکړه او زیاته یې کړه، چې د دوی مرستې به د زندانیانو د ژوندانه چارو لا ښه والي سره مرسته وکړي.

ذوالحجة الحرام ۱۶/ ۱۴۴۵

د مقام د دفتر ریاست

د اطلاعاتو او عامه اړیکو امریت