د ا.ا.ا. یو شمېر لوړپوړو چارواکو د زندانونو چارو د سمون ادارې له رهبرۍ پلاوي سره وکتل

د ا.ا.ا. د کډوالو او بیا راستنېدونکو چارو سرپرست وزیر محترم مولوي خلیل الرحمان "حقاني"، د بهرنیو چارو وزارت سیاسي معین محترم مولوي شېرمحمد عباس "ستانکزي" او د کورنیو چارو وزارت استازي محترم مولوي محمدقاسم "ابراهیمي"، د زندانونو چارو د سمون ادارې له رئیس محترم مولوي محمدیوسف "مستري" سره په داسې حال کې، چې د ادارې نظامي مرستیال محترم لوی پاسوال قاري حبیب الله "بدر" او یو شمېر ملکي او نظامي مسوولینو هم شتون درلود، وکتل.
په دې کتنه کې، د هېواد د زندانونو، توقیفخونو او د ماشومانو د اصلاح او روزنې مرکزونو پر اړوندو مسایلو، لاسته راوړنو، محکومینو، تورنو او محجوزینو لپاره پر برابرو شویو اسانتیاوو او ستونزو بحث او خبرې اترې وشوې.
تر یادې کتنې وروسته، د ا.ا.ا. نوموړو چارواکو او د زندانونو چارو د سمون ادارې رهبرۍ پلاوي د کابل څرخي پله له مرکزي زندانه لیدنه وکړه، او هلته یې بندیانو ته د کورنیو سره یې د ټلیفوني اړیکو نیولو لپاره د (پي سي او) اسانتیا په ګډون له یو شمېر نورو امکاناتو ارزونه وکړه او هغه یې وستایل.
دغه راز، یادو چارواکو او د ادارې رهبرۍ پلاوي دې ادارې پورې اړوند مرکزي (۵۰) بستریز روغتون ته ورغلل، د دغه روغتون روغتیايي امکانات او بندیانو ته په کې برابرې شوې اسانتیاوې یې وارزولې او د لاښه والي هیله یې څرګنده کړه.
د زندانونو چارو د سمون ادارې رهبري تل د ازادۍ سلب مرکزونو ارزونې او لیدنې ته د ا.ا.ا. د چارواکو او مسوولینو د پاملرنې جلبولو په هڅه کې دي، څو له یوې خوا د دې دروند مسؤلیت د ترلاسه کولو په لاره کې د ستونزو د حل لپاره ورسره مرسته وکړي او له بلې خوا یې د مثبتو نظریاتو پرمټ د چارو د ګټورتوب او اغېزمنتوب بهیر غښتلی کړي.

رجب المرجب ۱۸/ ۱۴۴۴
د اطلاعاتو او عامه اړیکو امریت