د افغانستان اسلامي امارت د زندانونو چارو د سمون اداره، چې د هېواد یوه له خپلواکو او ډېرو مهمو ادارو څخه ده، چې د انساني او شرعي حقونو په رعایتولو د یو زیات شمېر محبوسینو، توقیفیانو او محجوزینو د ساتنې او پالنې ترڅنګ، په بېلابېلو برخو کې ورته لازم خدمتونه
د زده کړو په برخه کې: نوموړې ادارې د هېواد په ټولو زندانونو کې د زندانیانو د ښې روزنې په موخه د دیني او عصري زده کړو زمینه برابره کړې او په دې برخو کې یې پوه او تجربه لرونکي ښوونکي ګومارلي دي.
همداراز، د هغو محبوسو میندو ماشومان چې په کور کې سرپرست نه لري او د ساتنې لپاره یې څوک نه شته د میندو د حبس د مودې ترپایته رسېدو پورې له دوی سره اوسېږي، د هغوی لپاره هم په ښځینه محبسونو کې د ښې ساتنې او روزنې ترڅنګ، د زده کړې، لوبو او نورو بوختیاوو مناسبه زمینه برابره کړې ده.
د حرفوي زده کړو په برخه کې: دې ادارې نارینه محبوسینو ته د نجارۍ، خیاطۍ، غالۍ اوبدلو(قالین بافۍ)، مهره بافۍ، حلبي سازۍ، فلزکارۍ، رنګمالۍ د ځلوبیو، کلچو او کېک پخولو شاپونه فعال کړي.
همداشان، یادې ادارې ښځینه محبوسینو ته هم د سالمې بوختیا لپاره د خیاطۍ او مهره بافۍ شاپونه فعال ساتلي.
داراز، نوموړې ادارې د ماشومانو د اصلاح او روزنې مرکزونو کې ماشومانو محجوزینو ته هم د خیاطۍ، بوټ ګنډنې، مبایل جوړولو، نلدوانۍ، د برېښنایي وسایلو د ترمیم او لین دوانۍ شاپونه جوړ کړي چې دا ماشومان په کې په عملي توګه په کار بوخت دي.
زندانیانو(محبوسینو، توقیفیانو او محجوزینو) ته د خوړو برابرولو په برخه کې: د زندانونو چارو د سمون ادارې د اعاشې مسوولین د مرکز او ولایتونو په محبسونو، توقیفخونو او د ماشومانو د اصلاح او روزنې مرکزونو کې د غذايي مهالویش له مخې درې وخته ډوډۍ(غذا) او د هر موسم یا فصل تازه مېوې برابروي او د طبي ډاکټر تر معاینې وروسته یې پرې وېشي.
په روغتیايي برخه کې: د زندانونو چارو د سمون اداره د کابل ولایت د څرخي پله مرکزي زندان په قرارګاه کې د (۵۰) بستریز روغتون له لارې چې په ټولو طبي وسایلو او پوه طبي پرسونل باندې سمبال دی په مرکز کې د ټولو ښځینه او نارینه محبوسینو، توقیفیانو او محجوزینو درملنه کوي او هم د ۳۳ ولایاتو د زندانونو د روغتیايي پرسونل پرمټ د روغتیايي کلنیکونو او مرکزونو له لارې د محبوسینو، توقیفیانو او محجوزینو درملنې لپاره تر خپلې وسې امکانات، درمل او بسترونه برابر کړي دي.
له اړتیا سره سم نور خدمتونه: یادې ادارې د زندانیانو د ښې ساتنې او پالنې لپاره د هغوی د ژوندانه ټول اړین امکانات برابر کړي.
د ژمي په موسم کې زندانیانو ته د پاملرنې په لړ کې هغوی ته کمپلې، بخارۍ او نور ژمني توکي ورکول کېږي او له ازادې فضا او لمر څخه د استفادې لپاره هر ورځ او په ورځ کې دوه یا درې ساعته له خونو بهر راویستل کېږي. د زندانیانو د بدني روزنې او فزیکي-رواني روغتیا لپاره یې ورته د قانون له مخې د ځینو ورزشونو زمینه مساعده کړې ده.
همدا راز، د زندانونو چارو د سمون ادارې د مرکز او ولایتونو په زندانونو کې د زندانیانو لپاره کانټینونه جوړ کړي، چې په کې له زندانونو بهر د بازار په بیه خوراکي او نور اړین توکي پلورل کېږي او د دوی اړتیاوې پرې پوره کېږي.
داراز، دې ادارې د زندانیانو او د هغوی د کورنیو تر منځ د اړیکو لپاره د هېواد په ټولو زندانونو کې د (پي سي او) ټلیفوني خدمتونه چمتو کړي دي.
له زندانیانو سره د ملاقاتونو یا پایوازۍ په برخه کې: د زندانونو چارو د سمون ادارې د زندانیانو او د هغوی د کورنیو او دوستانو د لیدو- کتو لپاره د نورو لازمو اسانتیاوو برابرولو ترڅنګ، د پایوازانو لپاره یې د ملاقات ځای ته د لېږد لپاره یو شمېر موټران چمتو کړي دي.
د جرمي دوسیو د څېړنې لپاره له عدلي او قضايي اورګانونو سره د همغږۍ په برخه کې: د دغې ادارې د اړوندو مسوولینو له خوا د هېواد له عدلي او قضايي اورګانونو سره په همغږۍ د صلاحیت لرونکو او عادلو پلاوو د دوامدارو فعالیتونو، څارنو، ارزونو او جرمي دوسیو څېړلو او تعقیبولو ته پر وخت رسېدنه کېږي.
