د زندانونو چارو د سمون ادارې د پالېسۍ او مسلکي چارو مرستیال محترم قاري عبدالله همدرد په مشرۍ پلاوي غزني ولایت ته د سفر په دوهمه ورځ د دې ولایت د زندان د یو شمېر نورې برخې د وارزونې وروسته د دې ولایت له والي سره وکتل

د زندانونو چارو د سمون ادارې د پالېسۍ او مسلکي چارو مرستیال غزني ولایت ته د سفر په دوهمه ورځ په داسي حال کې چې د دې ادارې د ښوونې او بیا روزنې رئيس محترم مولوي عبدالوارث سادات, د نظامي ښوونې او روزنې د واحدې قوماندانۍ قوماندان محترم مل پاسوال مولوي شرافت الله حقاني او پالیسۍ او مسلکي چارو د معاونیت د دفتر آمر محترم خلیل الله بکتاش هم شتون درلود, د دې ولایت د زندان یو شمېر برخې وارزولې او اړوندو مسولینو ته یې د کار ښه والي لپاره لازمې لارښوونې وکړې. 
په پیل کې، د محترم قاري همدرد په مشرۍ پلاوي د غزني ولایت د زندان د ښوونې او روزنې له بهیر څخه له نږدې کتنې ترڅنګ د دې برخې شته امکاناتو د ارزونې څخه وروسته یې مسوولینو ته لارښونه وکړه څو د ښوونیزو چارو د ښه پرمخ وړلو لپاره اړوند مواد او قرطاسیه ورته په خپل وخت چمتو کړي.
 داراز، د پالېسۍ او مسلکي چارو مرستیال د دې ولایت د ماشومانو د اصلاح او روزنې مرکز مسوولینو سره په لیدنه کې په خپلو خبرو کې وویل:« محجوزین ماشومان که د قانون خلاف د هر ډول عمل ترسره کېدو له امله اوس په دې مرکز کې اوسېږي، خو دوی موږ ته د خپلو کورنیو امانت دي او مسوولین باید د دوی د امنیت، زده کړې، اصلاح او روزنې په برخه کې جدي پاملرنه وکړي.
داراز، نوموړي پلاوي د دې زندان د روغتیا له مسوولینو او ډاکټرانو سره په لیدنه کې د هغوی ستونزو او غوښتنو له اورېدو وروسته یې نوموړو ته لارښوونه وکړه څو د بندي ناروغانو سره د ښې رویې ترڅنګ د امکاناتو، تجهیزاتو پر برابرولو او باکفیته درملو څخه په ګټې اخیستنې سره د هغوی په درملنه کې ځانګړې پاملرنه وکړي.
د محترم قاري همدرد په مشرۍ پلاوي د لوژستیک او تخنیک له کارکونکو سره په کتنه کې د هغوی ستونزې او غوښتنې واورېدې او د حل په موخه یې اړوندو مسوولینو ته لازمې لارښوونې وکړې.
همدارنګه، پلاوي له عدلي او قضایي اورګانونو  سره د اړیکو امریت له مسوولینو سره په خبرو کې له هغوی وغوښتل څو د زندانیانو د محاکماتي چارو په برخه کې له نه ستړې کیدونکې هلوځلو څخه کار واخلي.
همداشان، پلاوي د یاد زندان له پایوازانو سره ولیدل د هغوی خبرې یې له نږدې واورېدې او د نوموړو لپاره یې د زندانیانو سره د کتنې، تګ راتګ او ورته نورو اسانتیاوو برابرولو په هدف یې مسوولینو ته لارښونه وکړه څو د پایوازنو د تلاشۍ په بهیر کې د دقت ترڅنګ له هغوی سره اسلامي چلند په پام کې ونېسي.
په ورته وخت کې، یاد پلاوي د زندانیانو لپاره د پخلنځي او د ډوډۍ پخولو له ځایه هم لیدنه وکړه او د خوړو د مینو لست له کتنې وروسته یې د پاکوالي په نظر کې نیولو په موخه اړوند کارکونکو ته لازمې لارښونې وکړې.   
همدارنګه، د زندانونو چارو د سمون ادارې د پالیسۍ او مسلکي چارو مرستیال په مشرۍ پلاوي د نوموړي زندان د پلورنځي څخه په لیدنه کې د نرخ نامې له چک او د موادو د تاریخ او کیفیت څخه له کتنې وروسته یې پلورنځي څښتن ته سپارښتنه وکړه څو د نرخ نامې سره سم باکیفیته توکي وپلوري. 
بل خوا، د محترم قاري همدرد په مشرۍ پلاوي د غزني ولایت د زندان له امنیتي قراولونو، ټاورونو، او امنیتي پوستو څخه په جلا جلا توګه لیدنه وکړه او د زندانیانو د امنیت د لا ټینګښت په موخه یې امنیتي مسوولینو ته یولړ سپارښتنې هم وکړې. 
په پای کې، د زندانونو چارو د سمون ادارې د پالېسۍ او مسلکي چارو مرستیال په مشرۍ پلاوي د غزني ولایت له والي محترم حاجي مولوي محمد امین جان "عمري" سره هم وکتل او د یادې ادارې په ځانګړي ډول د دې ولایت له محبس سره پر همکارۍ یې خبرې وکړې.
په دې لیدنه کې، محترم عمري د زندانونو چارو د سمون ادارې پلاوي ته د ښه راغلاست ویلو ترڅنګ د دې ولایت د زندان د مسوولینو د ښو چوپړتیاوو له امله مننه وکړه او زیاته یې کړه چې یادې ادارې تل زندانیانو ته غوره خدمات او اسانتیاوې برابرې او په ښه توګه یې د هغوی ساتنه او پالنه کړې ده.
همداراز، د زندانونو چارو د سمون ادارې د پالېسۍ او مسلکي چارو مرستیال د دې ولایت له والي او د مقام له چارواکو څخه مننه وکړه او له هغوی څخه یې وغوښتل چې د زندانونو چارو د سمون له ادارې سره خپلې همکارۍ ته دوام ورکړي.
داراز، د غزني والي محترم مولوي محمد امین "عمري" په خپلو خبرو کې زیاته کړه چې دوی به د زندانونو چارو د سمون له ادارې سره په دوامداره ډول خپلو مرستو او همکاریو ته دوام ورکړي.
د یادونې وړ ده، چې د یاد پلاوي ارزونه به د هېواد له یو شمېر نورو زندانونو  څخه هم دوام ولري.

ربیع الثاني ۲/ ۱۴۴۵
د مقام د دفتر ریاست 
د اطلاعاتو او عامه اړیکو امریت