د زندانونو چارو د سمون ادارې له روزنیز او مسلکي کورس څخه په دولسمه دوره کې (۱۲۲) تنه نظامي پرسونل فارغ شول

یاد کورس، چې د (۵۰) ورځو لپاره وو او په کې د هېواد د ۳۴ ولایتونو له زندانونو څخه د ټولي، ډلګي او بلوک قوماندانانو برخه اخیستې وه، د بندیانو د ساتلو، محکمو او څارنوالیو ته د هغوی د لېږدولو، د بندیانو د بلوا او شورش د کابو کولو، د زندانیانو د انساني او شرعي حقونو رعایتولو او د نظامي نظم او ډېسپلین په پام کې نیولو اړوند لازمې مسلکي زده کړې او روزنې ترلاسه کړې. 
داراز، په یاده موده کې نوموړو قوماندانانو ته د کشف او اوپراسیون په برخو کې هم ګټور معلومات او روزنه ورکول شوه.
د زندانونو چارو د سمون ادارې د نظامي چارو مرستیال محترم لوی پاسوال قاري حبیب الله "بدر" د دغې فراغت غونډې پرمهال، په داسې حال کې چې د نظامي چارو معاونیت د ارکان رئیس محترم پاسوال مولوي اسدالله "مولانا"، د نظامي ښوونې او روزنې د واحد قوماندانۍ قوماندان مل پاسوال مولوي شرافت الله "حقاني"، د ښوونې او بیا روزنې رئیس محترم مولوي عبدالوارث " سادات"، د دعوت او ارشاد رئیس محترم مولوي صدیق الله"صدیقي"، د کابل څرخي پله مرکزي زندان د ښوونیز(تعلیمي) مرکز قومندان محترم ملا حیات الله" احمدي" او یو شمېر نورو ملکي او نظامي مسوولینو او پرسونل هم شتون درلود، یادو فارغو ساتنمنانو او افسرانو ته په خطاب کې وویل: « که څه هم د ادارې رهبري او مسوولین تاسو ته په کابل کې د زده کړې او روزنې زمینه برابروي، خو کوښښ کوو چې په ولایتونو کې هم تاسو ته ورته زمنیه برابره شي، ځکه چې د زندانیانو ساتل لوی مسؤلیت دی».
همداشان، هغه د هېواد د ټولو زندانونو مسوولینو ته سپارښتنه وکړه، چې له زندانیانو سره ښه چلند وکړي، هغوی ته د دیني، عصري او حرفوي زده کړو زمینه برابره او د انساني او شرعي حقونو په خویندیتوب کې یې جدي پاملرنه وکړي، څو ټول محبوسین، تورن او محجوزین د سالمو او اصلاح شویو وګړو په توګه له خپلو کورنیو او ټولنې سره یوځای شي.
په ورته وخت کې، د ادارې د ښوونې او بیا روزنې رئیس محترم مولوي عبدالوارث "سادات" او د ارشاد او دعوت رئیس محترم مولوي صدیق الله "صدیقي" هم یادې غونډې ته د وینا په ترڅ کې وویل، اوس په زندانونو کې د تربل هروخت د ښونې او روزنې بهیر چټک، غښتلی او پراخ شوی دی.
 په ورته مهال، د زندانونو چارو د سمون ادارې د نظامي چارو د معاونیت د ارکان رئیس محترم پاسوال مولوي اسدالله "مولانا" د یاد کورس برخه والو ته وویل، هیله ده چې په کورس کې د درکړل شويو درسونو له لارې په خپلو چارو کې شته نیمګړتیاوې حل کړئ. 
یاده غونډه، د زندانونو چارو د سمون ادارې د روزنیز او مسلکي کورس دوولسمې دورې دغو (۱۲۲) تنو فارغانو ته د فراغت د سند په توګه د تصدیق پاڼو په ورکړې او د خیر د دعا په کولو سره پایته ورسېده.
هېره دې نه وي، چې د زندانونو چارو د سمون ادارې د نظامي پرسونل د ښوونې او روزنې له لارې د هغوی د کاري وړتیا لوړولو لپاره د نوموړو کورسونو لړۍ به په راتلونکې کې هم دوام ولري.

ذوالحجه ۷/ ۱۴۴۴
د مقام د دفتر ریاست
د اطلاعاتو او عامه اړیکو امریت