د زندانونو چارو د سمون ادارې له یو میاشتیني روزنیز او مسلکي کورس څخه په شپږمه دوره کې (۱۳۱) ساتونکي مجاهدین فارغ شول
یادو ساتونکو، چې د هېواد د ۳۴ ولایتونو له زندانونو څخه په دې کورس کې برخه اخیستې وه، د بندیانو د ساتلو، محکمو او څارنوالیو ته د هغوی د لېږدولو، د بندیانو د بلوا او شورش د کابو کولو، د زندانیانو د انساني او شرعي حقونو رعایتولو او د نظامي نظم او ډېسپلین په پام کې نیولو اړوند لازمې مسلکي زده کړې او روزنې ترلاسه کړې.
د زندانونو چارو د سمون ادارې د پالېسۍ او مسلکي مرستیال محترم قاري عبدالله "همدرد" په دې اړه د جوړې شوې غونډې په ترڅ کې، چې د ادارې د ښوونې او روزنې رئیس محترم مولوي عبدالوارث" سادات"، د دعوت او ارشاد رئیس محترم مولوي صدیق الله" صدیقي"، د کابل څرخي پله مرکزي زندان د ښوونیز(تعلیمي) مرکز قومندان محترم ملا حیات الله" احمدي" او یو شمېر نورو ملکي او نظامي پرسونل او مسوولینو هم شتون درلود، د خپلو خبرو پرمهال یادو فارغو شویو ساتونکو ته په خطاب کې وویل: « ستاسو خدمت هم دنیوي او هم اخروي اجر لري، خو ښه به دا وي چې اخروي اجر یې تر دنیوي امتیاز غوره وګڼئ، له عامو خلکو سره ښه چلند وکړئ، ځکه هغوی ډېر کړېدلي او ځورېدلي دي، همداشان په خپلو منځونو کې اتفاق ولرئ او نیتونه مو یو بل ته پاک کړئ، چې په دې سره به مو الهي(ج) عزت او د نظام بقا په نصیب شي».
په ورته وخت کې د ادارې د ښوونې او روزنې او د ارشاد او دعوت محترمو رئیسانو هم په خپلو ویناوو کې، نوموړو ساتونکو ته په ټینګار سره وویل: « تاسو ته د دغې یو میشاتینۍ زده کړې وروسته ستاسو مسوولیتونه لانور هم زیات شول او پوهه مو ډېره شوه، خو باید په خپلو چارو کې غفلت ونه کړئ او په خالصانه توګه درسپارل شوې دنده ترسره کړئ».
یاده غونډه، د زندانونو چارو د سمون ادارې د روزنیز او مسلکي کورس د شپږمې دورې (۱۳۱) تنو ګډونوالو ساتونکو مجاهدینو ته د فراغت د سند په توګه د تصدیق پاڼو په ورکړې او د خیر د دعا په کولو سره پایته ورسېده.
په پام کې ده، چې د دغې ادارې د ښوونې او روزنې ریاست د ښوونیزې قومندانۍ له خوا به په راتلونکې کې هم، د دا ډول کورسونو لړۍ دوام ولري.
شعبان المعظم ۲۸/ ۱۴۴۴
د مقام د دفتر ریاست
د اطلاعاتو او عامه اړیکو امریت
