د زندانونو چارو د سمون ادارې نظامي مرستیال او مل پلاوي یې د کاپیسا ولایت له زندانه لیدنه وکړه
د نوموړې ادارې د نظامي چارو مرستیال محترم لوی پاسوال قاري حبیب الله "بدر" په داسې حال کې چې د ادارې له عدلي او قضایي اورګانونو سره د اړیکو رئیس محترم مولوي عبدالله "حقیق"، د پېژند عمومي مدیر محترم مولوي شامحمد "مفکر" او یو شمېر نور مسوولین هم ورسره وو کاپیسا ولایت ته سفر وکړ او هلته یې د یاد زندان له مسوولینو سره د کتنې په ترڅ کې د نوموړي زندان په اړوندو چارو سره بحث وکړ.
داراز، د نظامي چارو مرستیال په مشرۍ پلاوي د یادو زندان له زندانیانو سره هم ولیدل د هغوي ستونزې او غوښتنې یې له نږدې واورېدې او حل په موخه یې اړوندو مسوولینو ته لازمې لارښوونې وکړې.
په ورته وخت کې، محترم قاري بدر د یاد زندان مسوولینو ته په خبرو کې زیاته کړه: «زندانیان تاسو ته امانت دي نو د هغوی د ژوند کولو لازمو اسانتیاوو، ټولو دنیوي او شرعي حقونو ترڅنګ ورته د دیني، عصري او حرفوي زده کړو زمینه برابره کړئ څو پرمټ یې له ناوړه کړنو څخه لرې پاتې او ټولنې ته د خدمت وړ وګرځي».
داراز، محترم لوی پاسوال قاري حبیب الله بدر په مشرۍ پلاوي د نوموړي زندان د پرسونل او زندانیانو لپاره د خوړو(اعاشې)، اباتې، پخلنځي او روغتیایې برخو څخه د لیدنې ترڅنګ یې د دې زندان د امنیتي ټاورونو، قراولونو، پوستو او نورو امنیتي برخو وضعیت له نږدې وارزاوه او د زندانیانو لا خوندي امنیت په پار یې اړوندو مسوولینو ته لازمې سپارښتنې وکړې.
په پای کې، د ادارې د خوندیتوب او د کارکوونکو د دقیقې پژندنې په پار د زندانونو چارو د سمون ادارې د نظامي معاونیت له لورې د یاد ولایت د زندان د ملکي او نظامي پرسونل بایو مټریک هم ترسره شو.
د یادولو ده، چې د زندانونو چارو د سمون ادارې مسوولین، په دوامدار ډول د هېواد زندانونو د وضعیت ارزول، د مثبتو چارو غښتلتیا او ستونزو ته یې پروخت رسېدنه خپل مسوولیت ګڼي.
ربیع الثاني ۲۵\ ۱۴۴۵
د مقام د دفتر ریاست
د اطلاعاتو او عامه اړیکو امریت
