د زندانونو چارو د سمون ادارې نظامي مرستیال د دې ادارې له ملکي او نظامي پرسونل سره ولیدل
لوی پاسوال محترم قاري حبیب الله "بدر" نن(شنبې) په داسې حال کې، چې د نوموړې ادارې د ارشاد او دعوت رئیس محترم مولوي صدیق الله "صدیقي"، د ښوونې او بیا روزنې رئیس محترم مولوي عبدالوارث "سادات"، د څرخي پله مرکزي زندان رئیس محترم مولوي خالق داد "رحمت" او یو شمېر نورو ملکي او نظامي مسوولینو یې ملتیا کوله، په کابل کې د زندانونو چارو د سمون ادارې د مرکزي برخو له یو شمېر ملکي او نظامي پرسونل سره ولیدل.
محترم قاري حبیب الله " بدر" په خپلو خبرو کې یو ځل بیا د ادارې له نظامي یونیفورم څخه د نظامي پرسونل پر استفادې ټینګار وکړ او ټول ملکي او نظامي پرسونل ته یې توصیه وکړه، څو ځانونه په نبوي(ص) سنتو برابر، خپل لمونځونه په جماعت ادا او د ادارې لاښه پرمختګ لپاره خپلې چارې پر وخت او سمه توګه ترسره کړي.
په ورته وخت کې، د زندانونو چارو د سمون ادارې نظامي مرستیال زیاته کړه، « موږ ستاسو لپاره د دیني زده کړو زمینه برابره کړې، نو له دې زده کړو ښه ګټه واخلئ او له مخې یې خپلې کورنۍ، ټولنې او هېواد ته د خدمت جوګه شئ».
د زندانونو چارو د سمون ادارې رهبري او مسوولین که له یوې خوا خپل پرسونل ته د دیني زده کړو زمینه برابروي، له بلې خوا غواړي د همدې زده کړو له لارې د پرسونل پر ښې دیني او بشرپالنې روحیې د سمبالېدو پرمټ، د هېواد په مرکز او ولایتونو کې محبوسینو، توقیفیانو او محجوزینو سره د ښه چلند له لارې هغوی مثبتو کړنو ته راوبولي او د بدو کړنو له تکرار څخه یې راوګرځوي.
شوال المکرم ۲۳/ ۱۴۴۴
د مقام د دفتر ریاست
د اطلاعاتو او عامه اړیکو امریت
