د زندانونو چارو د سمون ادارې نظامي مرستیال په مشرۍ پلاوي د پکتیا ولایت له زندانه لیدنه وکړله
د زندانونو چارو د سمون ادارې نظامي مرستیال محترم لوی پاسوال قاري حبیب الله "بدر"، د دې ادارې د ښوونې او بیا روزنې رئیس محترم مولوي نظر محمد "ناصري"، د نوموړي ولایت د زندان رئیس محترم قاري عبدالغني "عادل" او مل پلاوي یې پکتیا ته د سفر په ترڅ کې د یاد ولایت د زندان مسوولینو سره يې پر اړوندو مسایلو بحث وکړ.
محترم لوی پاسوال قاري حبیب الله بدر د نوموړي ولایت د زندان له زندانیانو سره هم ولیدل او د هغوی د ستونزو تر اورېدو وروسته یې وویل، « موږ ډېر کوښښ کړی چې اصلاحي او روزنیز پروګرامونه عملي کړو، نو هیله لرم چې له یوې خوا دا پروګرامونه په زندان کې ستاسو د اصلاح او بیا روزنې لامل شي او له بلې خوا تاسو هم ترې له بدو او ناروا کړنو څخه د ډډه کولو لپاره ګټه واخلئ او هم له بنده وروسته د یو سالم وګړي په توګه خپلې کورنۍ او ټولنې سره یو ځای شئ ».
په ورته وخت کې، د دې ولایت د زندان زندانیانو د محترم لوی پاسوال قاري حبیب الله بدر په مشرۍ د پلاوي په ورتګ خوښي وښوده او له دوی سره د زندان د مسوولینو چلند یې ښه یاد کړ او د خپلو جرمي دوسیو د ژر څېړلو موضوع یې یوه له مهمو او روا غوښتنو څخه وګڼله، چې د پلاوي له خوا ورته د حل ډاډ ورکړل شو .
په پای کې، د محترم لوی پاسوال حبیب الله بدر په مشرۍ پلاوي د نوموړي زندان د ډوډۍ پخولو، خوړو پخولو، او تعمیراتي او روغتیايي چارې د لیدنې ترخوا یې د امنیتي ټاورونو، قراولونو، پوستو او نورو امنیتي برخو وضعیت له نږدې وارزوله او د هغو لا ښه والي او شتو ستونزو د هواري په موخه یې مربوطه مسوولینو ته لازمې سپارښتنې وکړې.
ربیع الاخر ۲۱/ ۱۴۴۷
د مقام د دفتر ریاست
د اطلاعاتو او عامه اړیکو امریت
