د زندانونو چارو د سمون ادارې (۱۲۴) تنو منسوبینو ته ښوونیز او مسلکي کورس پیل شو
دغه کورس، چې د درې میاشتې لپاره دی، د زندانونو چارو د سمون ادارې د تعلیمي مرکز له خوا جوړ او په کې د ادارې د مرکز او (۳۳)ولایتونو (۱۲۴) تنه منسوبین ګډون کوي.
یادو ګډونوالو ته په نوموړي کورس کې د بندیانو د ساتلو، ښه چلند کولو، د زندانیانو د بشري حقونو رعایتولو، د نظامي نظم او ډسپلین په پام کې نیولو او نظامي یونیفورم څخه د استفادې اړوند لازمې مسلکي زده کړې ور زده کول کېږي.
په همدې اړه د جوړو شویو مراسمو پرمهال، د زندانونو چارو د سمون ادارې نظامي مرستیال محترم لوی پاسوال قاري حبیب الله "بدر" په داسې حال کې، چې د کشف او اوپراتیفي رئیس محترم مولوي عبدالشکور طیب، د نظامي ښوونې او روزنې د واحد قوماندانۍ قوماندان محترم مل پاسوال مولوي نورالله "دروېش" او یو شمېر نورو ملکي او نظامي مسوولینو هم شتون درلود ، د یاد ښوونیز او مسلکي کورس ګډونوالو ته په خبرو کې وویل: « ټول نظام په ځانګړې توګه دا اداره تاسو ته سترګې په لار ده، نو د ښوونکو له خوا چې درته کومې زده کړې درکول کېږي په غور سره زده او په خپلو چارو کې یې عملي کړئ».
محترم لوی پاسوال قاري حبیب الله بدر زیاته کړله، چې د کبر او غرور څخه ځان وساتئ د یو او بل احترام د صبر او حوصلې څخه په خپلو چارو کې کار واخلئ او تل مو هڅه خپلو خلکو او هیواد ته خدمت کول وي.
د یادونې وړ بولو، چې د دغه درې میاشتیني ښوونیز او مسلکي کورس (۱۲۴) ګډونوالو ته به د کورس په پای کې د زندانونو چارو د سمون ادارې د رهبرۍ له خوا د فراغت د سند په توګه تصدیق پاڼې هم ورکړل شي.
ربېع الاخر ۲۹/ ۱۴۴۷
د مقام د فتر ریاست
د اطلاعاتو او عامه اړیکو امریت
