د کابل ولایت د توقیفخونې ۴۸ توقیفیانو ته مننلیکونه ورکړل شول

د افغانستان د ا.ا د زندانونو چارو د سمون ادارې له خوا د کابل ولایت توقیفخونې هغو ۴۸ توقیفیانو ته مننلیکونه ورکړل شول، چې د دغې ادارې له لورې په برابرو شویو دیني، عقیدتي، فکري او فرهنګي درسونو کې یې په پوره لېوالتیا او فعال ډول ګډون درلود.
د زندانونو چارو د سمون ادارې مسلکي او پالېسۍ مرستیال قاري عبدالله "همدرد"، په دې اړه د جوړو شویو مراسمو په ترڅ کې، چې د کابل ولایت د زندانونو چارو د سمون رئیس محترم مولوي عبدالله "حقیق"، د ادارې د دعوت او ارشاد رئیس محترم مولوي صدیق الله "صدیقي"، د ښوونې او روزنې رئیس محترم مولوي عبدالوارث "سادات"، د کابل ولایت د څار او توقیفخونې رئیس قاري عبدالغني "عادل"، د څرخي پله مرکزي زندان د ګارنیزیون د امنیتي قطعې قومندان محترم مولوي شرافت الله "حقاني" او یو شمېر نورو مسوولینو او پرسونل هم شتون درلود وویل: « د ادارې رهبري په ځانګړې توګه د مسلکي او پالېسۍ معاونیت تل د بندیانو، تورنو او محجوزینو پر بیا روزنې ټینګار کوي، لازمه زمینه ورته برابروي او د نورو اجرایوي پالېسیو او کړنلارو ترڅنګ په ازادۍ سلب مرکزونو کې د ښوونیزو او روزنیزو پروګرامونو د لاښه والي او ګټورتوب پر پالېسۍ هم کار کوي».
د محترم قاري همدرد په وینا، د همدې پالېسۍ پر بنسټ دا دی په کابل توقیفخونه کې د توقیفیانو لپاره د دیني درسونو بهیر پیل او له امله یې نن یوشمېر توقیفیانو ته د ستاینې په موخه مننلیکونه ورکول کېږي.
داراز، د کابل ولایت د زندانونو چارو د سمون رئیس محترم مولوي عبدالله "حقیق" په یادو مراسمو کې د خبرو پرمهال وویل، په دیني، عقیدتي، فکري او فرهنګي  درسونو کې د توقیفیانو ګډون او د مننلیکونو ترلاسه کول د دوی د محاکماتي چارو په بهیر کې اسانتیا راولي او له ځینو قانوني او حقوقي امتیازونو څخه یې برخمنېږي.
په ورته وخت کې، د مراسمو نورو ویناوالو هم د کابل ولایت په توقیخونه کې د نوموړو درسونو د ګډونوالو توقیفیانو پر برخه اخیستو خوښي وښوده او له هغوی یې وغوښتل، څو خپل وخت ضایع نه کړي، په یادو درسونو کې ښه برخه واخلي او هم خپله دیني، عقیدتي، فکري او فرهنګي پوهه زیاته کړي.
دغه مراسم، د دې درسونو ۴۸ تنو برخه والو توقیفیانو ته د هڅونې او ستاینې په موخه د مننلیکونو په ورکولو سره پایته ورسېدل.

جمادي الاول ۲۶/ ۱۴۴۴
د اطلاعاتو او عامه اړیکو ریاست