مرکزي او ولایتي خبرونه: د کابل ولایت د ماشومانو د اصلاح او روزنې په مرکز کې له محجوزینو د کتاب لوستنې ازموینه واخیستل شوه
د کابل ولایت د ماشومانو د اصلاح او روزنې په مرکز کې د تنویر فرهنګي ټولنې له لوري د «ځوانانو مسوولیت» تر عنوان لاندې د کتاب لوستنې سیالۍ ازموینه واخیستل شوه.
د مسوولینو په وینا، یاده ازموینه د دې مرکز د محجوزینو د فکري او فرهنګي ودې، د مطالعې د کلتور د پیاوړتیا او د مسوولیت احساس د لوړولو په موخه ترسره شوه، چې ګڼ شمېر محجوزینو پکې ګډون کړی و.
د تنویر فرهنګي ټولنې استازو وویل، هڅه کوي د ورته فرهنګي او علمي پروګرامونو له لارې محجوزین مطالعې ته وهڅوي، څو د پوهې له لارې خپل راتلونکی روښانه کړي.
د ماشومانو د اصلاح او روزنې مرکز رئیس محترم مولوي شرافت الله"حقاني"د یادې ټولنې څخه په مننې د دغسې پروګرامونو هرکلی وکړ او زیاته یې کړله، چې د محجوزینو د فکري او تعلیمي ودې لپاره به دا ډول فعالیتونه دوام ولري.
پکتیا:
د پکتیا ولایت په زندان کې د (۳۳) تنو بېوزلو زندانیانو له کورنیو سره مرسته وشوه
د پکتیا ولایت د محترم والي د لارښوونې پر بنسټ، د اړوندو ادارو له لوري د یاد ولایت د زندان د ۳۳ تنو بېوزلو او لاچاره زندانیانو له کورنیو سره د خوراکي توکو مرسته ترسره شوه.
د معلوماتو له مخې، په دې مرسته کې یوه بوجۍ اوړه، یو بوتل غوړي، بوره، لوبیا او خرما شامل وو، چې د یاد زندان پر اړمنو کورنیو د زندان او سیمه ییزو مسوولینو په حضور کې ووېشل شول، څو د هغوی د ژوند د ورځنیو اړتیاوو په پوره کولو او د اقتصادي ستونزو په کمولو کې مرسته وشي.
رمضان المبارک ۲۱/ ۱۴۴۷
د مقام د دفتر ریاست
د اطلاعاتو او عامه اړیکو امریت
