ولایتي خبرونه(پکتیا، سرپل) د پکتیا ولایت د زندان مسوولینو د کونړ ولایت زلزله ځپلو سره مرسته وکړله
د نوموړي زندان رئیس محترم قاري عبدالغني "عادل" وویل چي د یاد زندان امرینو او ساتونکو له لورې د کونړ ولایت زلزله ځپلو سره د یو شمېر نقدو پیسو مرسته وکړله، چې په زلزله کې خلک سخت زیانمن شوي دي.
د دې زندان رئیس، زلزله ځپلو قربانیو له کورنیو سره د ژورې خواخوږۍ او غمشریکۍ په څرګندولو سره وویل: دغه طبیعي پېښه د ټولو افغانانو لپاره ستره غمیزه ده، دا زمونږ انساني او اسلامي مسوولیت دی څو د شهیدانو کورنیو او ټپیانو د دردونو په کمولو کې ونډه واخلو.
د یوبل خبر له مخې، د سرپل ولایت په زندان کې د زندانیانو ترمنځ د (الحق المبین )کتاب تر نامه لاندې سیالیو ګډنوالو ته ډالۍ ورکړل شوې
په دغه سیالۍ کې، چې د دې ولایت د زندان یوشمېر زندانیانو برخه اخیستې وه، د هغوی د فکري روزنې او د مطالعې فرهنګ د ودې په موخه د نوموړي زندان د ښوونې او بیا روزنې امریت په همکارۍ په شفافه توګه ترې ازموینه واخیستل شوه.
په دې اړه جوړو شویو مراسمو کې، د سرپل ولایت د زندان امر محترم ملا ګل محمد "بلخي"، د نوموړي ولایت د اطلاعاتو او کلتور رئیس په ګډون یو شمېر سیمه ییزو مسوولینو هم شتون درلود، ویناوالو د مطالعې پر ارزښت خبرې وکړې او زندان یې د تعلیم مرکز وباله او له زندانیانو څخه یې وغوښتل چې خپل وخت بې ځایه تېر نه کړي او شته فرصت څخه په ګتې اخیستنې سره مطالعه وکړي.
د یادونې وړ ده، د غه سیالۍ چې څه موده مخکې له ګډونوالو څخه یې ازموینه اخیستل شوې وه، د ازموینې له پایلو وروسته اول، دوهم، دریم او څلورم مقام اخیستونکي د ستاینلیکونو ترڅنګ یو شمېر نقدي ډالۍ ورکړل شوې.
ربیع الاول ۱۱/ ۱۴۴۷
د مقام د دفتر ریاست
د اطلاعاتو او عامه اړیکو امریت
