ولایتي خبرونه:(پکتیا، هلمند، جوزجان، هرات) د پکتیا ولایت په زندان کې د زندانیانو ترمنځ د (اهل سنه والجماعة) کتاب سیالۍ ترسره شوه.
په دغه سیالۍ کې، چې د دې ولایت د زندان زندانیانو برخه اخیستې وه، د الکوثر فکري او فرهنګي ټولنې او د نوموړي زندان د ښوونې او بیا روزنې امریت لخوا په شفافه توګه ترې ازموینه واخیستل شوه.
د نوموړي ولایت د زندان رئیس محترم قاري عبدالغني "عادل" زندانیانو ته د وینا پرمهال د مطالعې ارزښت په اړه خبرې وکړې او د محبوسینو څخه یې وغوښتل چې دیني زده کړو په ترلاسه کولو کې خپلې هڅې لا زیاتې کړي.
همداراز، د ازموینې تراخیستلو وروسته بریالیو ګډونوالو ته د الفجر ساعتونه، قلم لرونکي قران کریم او نقدي ډالۍ ورکړل شوې.
هلمند:
د هلمند ولایت په زندان کې د ترکاڼۍ شاپ پرانېستل شو
د زندانونو چارو د سمون ادارې د اقتصادي برنامو او ستراتېژیکو اړیکو ریاست په هڅو او د هلمند ولایت د زندان د مسوولینو په همکارۍ د (OYDO) موسسې له لورې د نوموړي زندانیان د زندانیانو د روزنې په موخه د ترکاڼۍ شاپ پرانېستل شو.
همداراز، د یادې موسسې له لورې د شاپ ګډونوالو ته یوه اندازه د ترکاڼۍ وسایل هم ورکړل شول.
د یاد زندان رئیس محترم ملا بهاء الدین دا شان د رونېزو برنامو پلي کېدل د زندانیانو په روزنه کې خورا اړین یاد کړل او د کورنیو او نړېوالو بنسټونو څخه د ورته نورو ښوونیزو او روزنیزو برنامو جوړولو غوښتنه وکړله.
جوزجان:
د جوزجان ولایت د زندان لپاره نوی نظامي مدیر وټاکل شو
د زندانونو چارو د سمون ادارې عمومي رئیس محترم الحاج مولوي محمدیوسف "مستري" په سپارښتنه، د بلخ ولایت د زندان رئیس محترم مولوي کمال الدین "زاهد" له لورې محترم ملا روز الدین "سعادت" د جوزجان زندان د نظامي مدیر په توګه د زندان ملکي او نظامي پرسونل ته معرفي او په چارو کې ورته د بریالیتوب هیله وشوه.
داراز، د یاد زندان مسوولینو د نوموړي ولایت د زندان د مخکیني امنیتي مسوول کړنې او فعالیتونه وستایل او د یاد زندان له نظامي پرسونل څخه یې له اوسني مسوول سره د همکارۍ او په ګډه د چارو ښه پرمخ وړلو غوښتنه وکړله.
هرات:
د هرات ولایت د زندان د ماشومانو د اصلاح مرکز له محجوزینو سره د یونیسف موسسې له لورې د ژمنیو، حفظ الصحې او اړتیا وړ توکو مرسته وشوه.
یاده مرسته، چې په کې کمپلې، قرطاسیه، شامپو، صابون، فرش، د اوبو ګرمولو بایلر او یوشمېر نور د اړتیا وړتوکي شامل و، د زندانونو چارو د سمون ادارې د اقتصادي برنامو او ستراتېژیکو اړیکو ریاست په هڅو او د یونیسف موسسې له خوا د دغه ولایت د زندان د مسوولینو له لورې د یاد ولایت د ماشومانو د اصلاح مرکز پرمحجوزینو په شفافه توګه وویشل شوه.
د هرات ولایت د زندان رئیس محترم ملا شراف الدین "مخلص"د یونیسف موسسې له دغې انسان دوستانه مرستې مننه او په راتلونکې کې یې د ورته مرستو د دوام غوښتنه و کړله.
جمادي الثاني ۱۹/ ۱۴۴۷
د مقام د دفتر ریاست
د اطلاعاتو او عامه اړیکو امریت
